Надежда да Кирилл Смирновъяс ӧтлаынӧсь 2017 восянь. Таӧдз куим во тӧдмалӧмаӧсь ёрта-ёртсӧ.
Кыкнанныс зільӧны «Т Плюс» акционер котырлӧн Коми филиалын. Кирилл кывкутӧ, медым йӧзӧс да предприятие-организацияяс биӧн да шоныдӧн могмӧдысьяслӧн вӧлі тырмымӧн транспорт да ломтас-мавтас. Надежда маркетинг юкӧнын жӧ котыртӧ энергетикъяслы став колана эмбур ньӧбӧмсӧ.
Куим во да дас тӧлысь сайын налӧн чужис Варенька ныв. Ӧні кагукныс ветлӧдлӧ детсадйӧ.
Куимнанныс радейтӧны спорт. Кирилл ворсӧ баскетболӧн. «Т Плюс» командакӧд ветлывлӧ вермасьны Россияса мукӧд регионӧ. Таысь кындзи быд вежон песӧ асьсӧ тренажёра залын да бассейнын, журъялӧ велосипедӧн.
Надежда радейтӧ котравны лызьӧн, уявны бассейнын да ветлыны велосипедӧн. Таысь ӧтдор гижӧдчӧма йога секцияӧ.
А дзолюкныс радейтӧ журъявны самокатӧн. Быдмас да, гашкӧ, лоас видз-му либӧ вӧр овмӧсса специалистӧн. Ӧні нин вӧрӧ ветліганыс лейкаӧн киськалӧ чӧд, пув, дзоридзьяс да ичӧт козъяс, мед пӧ ӧдйӧджык быдмасны.
Но, гӧгӧрвоана, Надежда, Варенька да Кирилл медся ёна радейтӧны ӧта-мӧднысӧ. <>
Николай РАЗМЫСЛОВ. Снимокыс авторлӧн.