Июнь 22 лунӧ ми казьтылам война вылын усьӧмаясӧс. Тшӧтш и найӧс, кодъясӧс олӧмыс тӧдмӧдліс миянкӧд. Кӧсъя висьтавны куим Иван йылысь. Войнаыс вужвыйӧн вежис налысь олӧмсӧ, кӧть эськӧ коймӧдыс эз и тышкась фронт вылын.
«Невель, Невель, лӧз тыяса му…» Тайӧ муыс ӧтувтіс куим Иванӧс.
Медводдза Иваныс – 28-ӧд Невельскӧй стрелкӧвӧй дивизиялысь историясӧ туялысь Иван Петрович Конюхов. Сулала Ыбын, видзӧда, кыдзи тракторӧн кисьтӧны сылысь керкасӧ, да казьтыла сылысь кывъяссӧ: «Ті со Рытыв-Войвыв фронт вылын уджаланныд, «кыпӧданныд» усьӧм салдатъяслысь коляссӧ. А ме тышкасьлі Калининскӧй фронт вылын. Уна ёрт менам сэні пӧгибнитіс».
88-ӧд полк, кӧні служитліс сержант Иван Конюхов, 1943 вося октябрын мездіс Невель кар. И сылӧн кывъясыс, гашкӧ, туйдісны миянӧс, Н.К.Лошаков нима «Наследие» поискӧвӧй отрядсаӧс, мӧдӧдчыны Невельӧ. 2008 восянь Паметь вахтанымӧс нуӧдам сэні.
Невельын медводдза вахта дырйи Великие Луки карса вокзалын миянӧс вочааліс мӧд Иван. Неыджыд тушаа, дзор юрсиа, камуфляж паськӧма морт висьтасис: «Михайлов Иван Петрович, Псков обласьтысь «Гвоздика» корсьысян отрядса командир».
А бӧрынджык сійӧ казьтыштіс, мый думайтӧма миянӧс медводдзаысь аддзигӧн. Чуйми пӧ: «Тайӧ жӧ челядь!». Збыльысь, Паметь вахта вылӧ сэки мунім 8-ӧд классын велӧдчысьяскӧд: Екатерина Афанасьевакӧд, Ольга Андреевакӧд, Александра Катаевакӧд, Яна Сердитовакӧд, Дарья Дегтярёвакӧд, Анна Ларионовакӧд, Юлия Низовцевакӧд, Георгий Томовкӧд, Павел Шучалинкӧд. Чуйман и повзян. Но регыд нин, кор Ивлево грездсянь неылын кык лунӧн «кыпӧдім» 42 салдатӧс, Иван Петрович ошкис миянӧс да корис нӧшта на волыны.
Дас ӧти во сэксянь коли. «Гвоздика» да «Наследие» отрядъясысь боечьяс «кыпӧдісны» уна сё усьӧм салдатӧс, туялісны юӧртӧг вошӧм уна дас мортлысь ним-вич-овсӧ.
–Ми гӧрдитчам асланым бать-пӧльясӧн, – шулывліс «Гвоздикаса» командир Иван Петрович Михайлов. – Но тайӧ этша на. Колӧ, медым миян пиян, внукъяс, правнукъяс эз вунӧдны историянымӧс. Коді кӧть ӧтчыд уджаліс Паметь вахта дырйи, сылысь видзӧдлассӧ некутшӧм неофашистъяс оз нин вежны.
Кадыс нуӧ миян дорысь ёртъяснымӧс. 2017 вося июль 17 лунӧ кувсис Иван Петрович Конюхов, 2018 вося май 25 лунӧ – Иван Петрович Михайлов. И тайӧ воясас Паметь вахтаяссӧ ми сиим налы, ӧд «коми дивизияын» Иван Конюхов тышкасис вӧрӧгкӧд, а Иван Михайлов вӧр-нюрті уна сё километр муніс, медым «кыпӧдны» усьӧм салдатъясӧс. Ӧтувтӧ найӧс тшӧтш и сійӧ, мый кыкнанныс чужлӧмаӧсь июнь 28 лунӧ: И.П.Конюхов 1921 воӧ, И.П.Михайлов – 1950-ӧдӧ.
2018 вося Паметь вахта дырйи «аддзысим» коймӧд Иванкӧд. Август 11 лунӧ ми уджалім Слуки грездсянь неылын. «Кыпӧдім» война кадас дзеблытӧм салдатӧс, орччӧн вӧліны сылӧн каска, винтовка, противогаз, патронъяс. Фотоаппаратӧн снимайта Инита Шафелысь – Иван Петрович Михайловлӧн внучкалысь – уджсӧ. Юася: «Инита, гашкӧ, кӧсъян, медальон мед сюрас?» – «Да, кӧсъя».
А дас вит минут мысти кыла сылысь гӧлӧссӧ: «Медальон!»
Поисковиклы медальон сюрӧмыс – медыджыд шуд. Но колӧ на видзӧдлыны, эм-ӧ сы пытшкын гижӧдыс, пасйӧма-ӧ сэні ним-вич-овсӧ. Война дырйиыд ӧд салдатъяс шулісны татшӧм гижӧдсӧ «паспорт смертиӧн» да эз гижлыны овсӧ.
Рытнас чукӧртчим штаблӧн палатка дорын, виччысям, кор Псковысь «След пантеры» отрядса командир Геннадий Владимирович Корольков восьтас медальонсӧ, перъяс кабаласӧ. А сэні гижӧд. Лыддям: «Петрович, Иван, Михайлов, красноармеец, 1915 г.р., с. Фёдоровка, Башкирская АССР». Горшын мыйкӧ гӧрддзасис, синваным чепӧсйис. Ми «кыпӧдім» Невельса Иван Петрович Михайловлысь тьӧзӧсӧ! Салдат Иван Петрович Михайлов усьӧма 1941 вося августын, и бӧръя кадӧдз сійӧс лыддисны война вылын юӧртӧг вошӧмаӧн. Абу, абу вошӧма! Пӧгибнитӧма Айму дорйигӧн!
Регыд сюрины и воинлӧн рӧдвужыс. 2018 вося октябрь 3 лунӧ Иван Петрович Михайловӧс геройӧс моз дзебисны чужанінас, Башкирияса Фёдоровкаын.
* * *
Мунӧны олӧмысь ёртъяс, ветеранъяс. Коді водзӧ нуӧдас налысь уджсӧ? Коді оз сет косьмыны гвоздикалы – салдатъясӧс казьтылан паслы? Та вӧсна ковмас кывкутны миянлы, ветеранъяслӧн ёртъяслы, том йӧзлы, кодъяс воысь-во ветлывлӧны Паметь вахтаяс вылӧ.
Августын татшӧм вахтаыс бара лоас. А «Наследие» отрядса боечьяс босьтчисны збыльмӧдны «Салдатлӧн керка» уджтас, дзоньталӧны 1943 вося июль 9 лунӧ Курскӧй дуга вылын пӧгибнитӧм радӧвӧй Павел Иванович Лодыгинлысь керкасӧ. 2020 вося май 6 лунӧ тайӧ керкаас лоӧ восьтӧма Габов грездлӧн историялысь музей.
Сергей Таскаев,
«Наследие» отрядса командир.
«Коми му» газетысь, кодӧс позьӧ судзӧдны пошта пыр, позьӧ ньӧбны «Ордым» лавкаын. Медым лыддьыны электроннӧй версия, личкӧй татчӧ. Эмӧсь кӧ юалӧмӧяс, гижӧй komi-kerka@ya.ru.