2014 восянь «Монди СЛПК»-ын уджалӧ специалистъясӧс дасьтан школа. Тайӧ проект сертиыс таво велӧдчӧны автоматизация да метрология службаын уджавны кӧсйысьяс.
КИПиА специальносьт босьтӧны Сыктывкарса вӧр промышленносьт, сервис да связь колледжъясысь, юркарса политехническӧй техникумысь студентъяс.
Сідзжӧ комбинатын стажируйтчӧны шӧр специальнӧй велӧдчанінъясысь куим преподаватель. Найӧ аддзысьлӧны «Монди СЛПК»-ын зільысьяскӧд, вӧчӧны практика боксянь тӧдчана удж. Велӧдчан во помын ставныслы сетасны диплом, а медбуръяссӧ корасны уджавны вӧр комбинатӧ. Воддза вояс серти нин тыдалӧ, мый найӧ ӧдйӧ пырӧдчӧны компаниялӧн уджӧ.
– «Школа будущего специалиста» проектыс сетӧ миянлы позянлун уджавны тӧлка студентъяскӧд да дасьтыны предприятиелы колана специалистъясӧс, – висьталіс Россияын Монди котырса персонал юкӧнысь директор Анна Шабалина. – Школа помалысьяс локтасны миян дорӧ уджсӧ бура тӧдысь йӧзӧн нин. Ми дасьӧсь отсавны налы производствоын медводдза воськовъяссӧ вӧчигӧн, юксьыны уджын гусяторъясӧн да ышӧдны найӧс пуктыны экономикалысь вӧр юкӧн сӧвмӧдӧмӧ ассьыныс пай.
Сервис да связь колледжысь студент Максим Канев босьтӧ тӧдӧмлунсӧ производствоын технологияяс автоматизируйтан нырвизьын.
– Быд студентлы практика вылас окота веськавны «Монди СЛПК»-ӧ. И ме ыджыд кӧсйӧмӧн мӧдӧд во нин зіля тані. Предприятиеса наставникъяс юксьӧны миянкӧд асланыс опытӧн, – шуӧ сійӧ. – Специалистъясӧс дасьтан школаын велӧдчӧмыс сетӧ позянлун уджавны вӧр комбинатын. Проектӧ пырӧдчысьясӧс колледжын зэв стрӧга бӧрйӧны. Медвойдӧр видзӧдӧны, мед студентлӧн эз вӧв ни ӧти «3». Нӧшта мед и профессиональнӧй кужӧмлун конкурсын вермыліс.
2014 восяньыс тайӧ проект сертиыс комбинатын дасьтісны нин технологъясӧс, теплоэнергетикъясӧс, электрикъясӧс, механикъясӧс да мукӧд специалистӧс. Тайӧ каднас тӧдӧмлунсӧ босьтӧмаӧсь 138 студент, стажируйтчӧмаӧсь 17 преподаватель.
Специалистъясӧс дасьтан школа 40 прӧчент помалысьсӧ корӧмаӧсь уджавны комбинатӧ. 2017 вося мартын «Монди СЛПК»-лысь опытсӧ вылӧ донъялӧмаӧсь, GRADUATE AWARDS ставроссияса конкурсын, пасйӧмаӧсь «Компаниялӧн студентъяскӧд медбур удж» нимпасын.