Коркӧ кодкӧ вермис мӧвпыштны, мый Кӧрткерӧсысь Владимир Трошевлӧн веськӧдлӧм улын «Исерга» ансамбль веськалас Москваӧ «Привет, Андрей!» передача вылӧ? Дзик Андрей Малахов дорӧ?
Чайта, мый эз. Да и асьныс сьылысьясыс ӧнӧдз на шензьӧны! Сёрниныс сӧмын та йылысь. Збыльвывса татшӧм ыджыд телесъёмка вылӧ ӧд веськавлісны, Россияса «кодзувъяскӧд» аддзысьлісны. А кутшӧм нимкодь вӧлі видзӧдны передачасӧ, торйӧн нин кор комияс петкӧдчисны да Владимир Трошев йылысь висьтасисны.
Владимир Трошевкӧд тӧдсаӧсь важӧнкодь нин. Юркарса В.Т.Чисталёв нима культура колледжын велӧдчигас на сылысь босьтлі интервью. Том морт сэки воис сьӧлӧм вылӧ аслас прӧстлуннас, восьсӧн висьтасьӧмнас, гудӧкӧн мастера ворсӧмнас да водзӧ вылӧ аслыс могъяс тэчӧмнас.
Водзмӧстчысь морттӧ казялӧмаӧсь. Мӧд курсын велӧдчигас нин Владимирӧс корӧмаӧсь босьтчыны веськӧдлыны «Исерга» ансамбльӧн. И со куим во нин олӧма йӧз сылӧн син водзын мичаммӧны-томмӧны, окотапырысь да зэв мичаа сьылӧны. Кыдзи ачыс Владимир шуӧ, луннас пӧ вермасны куим концертӧдз сетны да нӧшта гортӧ локтігӧн тшӧктасны гудӧктӧ паськӧдлыны да пӧттӧдзыс на сьыласны – сэтшӧма налы тайӧ кажитчӧ!
– Владимир, висьтыштӧй, кыдзи веськалінныд Андрей Малаховлӧн передача вылӧ?
– Ставыс заводитчис сысянь, мый Комиысь этноблогер Генрих Немчинов снимайтіс менам чужан лун кежлӧ видео: менсьым олӧмӧс, сьылысь аньяскӧд ноксьӧмӧс, сьылӧм-ворсӧмӧс.
Со тайӧс и аддзӧмаӧсь Андрей Малаховлӧн редакторъясыс да вӧзйӧмаӧсь корны Россияса ылі пельӧсысь миянлысь котырнымӧс. Съёмочнӧй котыр воліс весиг Кӧрткерӧс районса Пезмӧгӧ да снимайтіс ме йылысь ставсӧ, сёрнитіс мамкӧд. Тайӧ юкӧнсӧ и петкӧдлісны «Россия 1» каналын.
Январас на ветлім Москваӧ Валерий Сёминлӧн корӧм серти, снимайтчим «Жар-птица» каналын. И со февральын нин корисны Андрей Малаховлӧн передача вылӧ.
А менам пыр вӧлі ыджыд, но гуся кӧсйӧм – тӧдмасьны «Садко» котыркӧд. Эг чайтлы, мый тайӧ регыдъя кадӧн збыльмас. А вӧлӧмкӧ…
Андрей Малаховлӧн «Привет, Андрей!» передачаын та пӧрйӧ юргисны роч йӧзкостса сьыланкывъяс.
Миян республикасаысь кындзи гӧсьтъясӧн вӧліны Россияса народнӧй артистъяс Людмила Николаева, Марина Денисова, Валерий Сёмин, «Садко» котыр, актёръяс Евгений Ткачук да Сергей Степин да мукӧд.
Сідзжӧ программаас пырӧдчис и француз сьылысь Марьон Ламолинери.
Комиысь гӧсьтъясӧс бура вочаалӧмаӧсь, овмӧдӧмаӧсь «Космос» гостиницаӧ, вердӧмаӧсь и новлӧдлӧмаӧсь торъя транспортӧн.
– Ыджыд съёмкаӧ пырӧдчим медводдзаысь, – шуис Владимир. – «Кодзувъясыд» зэв шаньӧсь, эз ышнясьны, бура сёрнитісны и фотографируйтчисны миянкӧд, кӧть эськӧ первойсӧ ёна полім наысь, эг тӧдӧй, кыдзи кутны асьнымӧс.
Съёмка дырйи полӧм вошис. Андрей Малахов аслас сёрниӧн, нюмъялӧмӧн, позьӧ шуны, сывдіс миянӧс. И сэсся ставыс муніс шыльыда да торксьывтӧг.
Ог вермы дзебны, меным сэтшӧм нимкодь вӧлі аддзыны «Садко» котырӧс! Ӧд пыр на кодьӧн кӧсйи лоны. И кор висьталі, мый, ок, ёна кажитчӧ налӧн «Сяду на пригорке» сьыланкывйыс, найӧ чеччыштісны места вывсьыныс да став Россиялы сьылісны сійӧс. А ми тшӧтш сувтім на дорӧ сьывны-йӧктыны!
Комиысь Владимир Трошев да «Исерга» ансамбль петкӧдчисны «В этой деревне огни не погашены» сьыланкывйӧн. Зэв жӧ бур да лӧсьыд артмис номерыс. Нимкодь, кор ас йӧз ыджыд сцена вылынӧсь! Мӧд синмӧн на вылӧ видзӧдан.
Передача дырйи жӧ артист Евгений Ткачук корис Владимир Трошевӧс Санкт-Петербургӧ, медым пырӧдчыны спектакль вылын уджӧ. Мый артмас таысь – петкӧдлас кадыс.
* * *
Катшасина турунвиж гудӧка том морт шызьӧдіс эз сӧмын миян республикаын олысьясӧс. Кыдзкӧ зэв ӧдйӧ сійӧ пырӧдчис ӧтуввезйӧ, телепередачаясӧ, йӧз олӧмӧ. Гашкӧ, став «кодзулыс» ассьыс олӧмсӧ тадзи заводитӧ да?!
Владимир Трошев бӧрйис олӧмас ассьыс нырвизь, и таысь сійӧ шуда. Оз пов вежсьӧмъясысь, выльторйысь. Сиа том мортлы пуктыны ас водзас выль могъяс, шедӧдны ыджыд вермӧмъяс да кольны сэтшӧм жӧ шоныд нюма, шань сьӧлӧма да восьса мортӧн.
Надежда Пунегова.
Снимокъясыс Владимир Трошевлӧн гортса архивысь.