Чайтам, миян пӧвстысь уналы коркӧ ковмыліс сулавны Россияса пошта юкӧнын кузь ӧчередын: ӧти дыр виччысяна пӧсылка босьтӧ, мӧд – биысь-ваысь мынтысьӧ, коймӧд – газет-журнал судзӧдӧ. А ӧні ставсӧ тайӧ да нӧшта уна на мукӧд услуга позьӧ босьтны ӧчередын сулавтӧг да весиг гортсьыд петавтӧг.
Буретш та йылысь Россияса пошталӧн Коми Республикаса управлениеӧн веськӧдлысь Виталий Васильевич Осипов висьталіс журналистъяскӧд аддзысьлігӧн.
Россияса пошта оз кольччы олӧмсьыс да вӧчӧ ставсӧ, медым республика пасьталаын ве-сиг медся ылыс сикт-грездын олысь войтырлӧн вӧлі позянлун тырвыйӧ вӧдитчыны став колана услуганас.
Ӧнія кадӧ пошта юкӧнъясын ёна сӧвмӧ лыдпаса технология да онлайн-услуга. Регионын олысь 295 сюрс морт вӧдитчӧны нин сідз шусяна электроннӧй кырымпасӧн. Мый тайӧ сэтшӧмыс? Шуам, тіянлы воис пӧсылка-бандероль либӧ заказнӧй письмӧ. Сійӧс босьтӧм могысь быть колӧ торъя кабала вылӧ гижны паспорт номер, ним-вич-ов да с.в. А эм кӧ тіян электроннӧй кырымпас, оператор сӧмын юалас телефон номернытӧ, и сійӧ жӧ здукас воас СМС пыр трекинг-номер. Сійӧс юӧртанныд да, мыччасны тіянлы виччысянатортӧ. Татшӧм кокньӧд вылас регистрируйтчыны позьӧ пошталӧн быд юкӧнын дон босьттӧг.
Пӧсылка-бандероль мӧдӧдӧм могысь оз жӧ ковмы дыр сулавны ӧчередын. Ӧні эм позянлун Россияса пошталӧн сайтын водзвыв пасйыны колана адрес. Торъя программа вӧчас трек-номера бланок, кодӧс позяс печатайтны да вайны пӧсылка мӧдӧдігӧн. Абу кӧ та могысь позянлуныс – колӧ сӧмын петкӧдлыны телефонсьыд операторлы, коді зіля сканируйтас колана номеръяссӧ. Водзвыв дасьтӧм бланокса бандероль позьӧ ыстыны бара жӧ ӧчередын сулавтӧг.
Бӧръя кадӧ унаӧн асланыс телефонӧ пуктӧны Россияса пошталысь приложение. Сы отсӧгӧн позьӧ вӧдитчыны став лыдпаса услуганас, тшӧтш и видзӧдны, кутшӧм карын нин тіян письмӧ-пӧсылканыд да кор стӧча воас урчитӧминас.
Регионса олысьяс вель ӧдйӧ велалісны судзӧдны газет-журнал онлайн-подписка пыр. Та могысь колӧ пыравны Россияса пошталӧн podpiska.pochta.ru сайтӧ, корсьны радейтана петас, мынтысьны банкса карточка серти и … ставыс. Бара жӧ – ӧчередын сулавтӧг да гортысь петавтӧг.
Тайӧ, дерт, ставыс зэв бур, торйӧн нин том-уловлы, кодъяс окотапырысь вӧдитчӧны уна сикас татшӧм услуганас. А мый вӧчны, шуам, ылі грездысь олӧма мортлы, кодлӧн, гашкӧ, и телефоныс абу, да и кокыс нин слаб ветлыны поштаӧдз? Отсӧг вылӧ бара жӧ воӧны Россияса пошталӧн выльторъяс – ӧні биысь-ваысь мынтысьны, письмӧ-бандероль ыстыны-босьтны, весиг сёян-юан ньӧбны позьӧ гортын жӧ пукалӧмӧн. Колӧ сӧмын звӧнитлыны асланыд пошта юкӧнӧ да висьтавны, мыйджык эськӧ матысса кадӧ тіянлы колӧ. Урчитӧм кадӧ поштальон оз сӧмын ставсӧ гортӧдзыд вай, но и отсалас мынтысьны коммунальнӧй услугаясысь, гижӧдас газет-журнал вылӧ, а ковмас кӧ, и бандероль-пӧсылкатӧ колана ногӧн дасьтас. Бӧръя кадас коронавирус ыджыдалігӧн весиг карса олысьяс ёна кутісны вӧдитчыны татшӧм кокньӧднас.
Юридическӧй организацияяслы Россияса пош-та дасьтӧма жӧ уна сикас лыдпаса услуга, на лыдын: «электронное уведомление о вручении», «электронное заказное письмо» да «бокс-сервис». Ӧти кывйӧн кӧ, бара жӧ кабинетысь петавтӧг позьӧ гоз-мӧд часӧн ыстыны да бӧр босьтны заказнӧй письмӧ, а ӧд водзті та могысь ковмыліс мунны поштаӧ да дыр сулавны ӧчередын, а нӧшта виччысьны письмӧ воӧмсӧ вежонъясӧн.
* * *
Россияса пошталӧн Коми Республикаса управлениеын 8 почтамт да 361 пошта юкӧн, на лыдысь 262-ыс – сикт-грездын.
Пошта юкӧнъясын зільӧ матӧ 2.500 сюрс морт, на пӧвстын витсё сайӧ поштальон, 460 оператор да 160 шопер.
Быд лун туйӧ петӧ Россияса пошталӧн 191 машина (на лыдын и курьеръяс), 75-ыс журъялӧны юркарӧд, 116-ыс ветлӧны мукӧд кар-районӧ.
Машинаысь ӧтдор Россияса пошта вӧдитчӧ и авиа, кӧрт туй, вавывса да весиг вӧла транспортӧн.
Галина МАКАРОВА.