Таво, 2021 вося апрель 23 лунӧ, Сыктывкарын мунiс Коми Республикаса Гижысь котырлӧн XIV съезд. Сылӧн медшӧр могъяс йылысь, талунъя коми да роч литература йылысь, гижысьяслӧн ӧнiя тӧжд-могъяс йылысь лыддьӧй Елена Ельцовалӧн Гижысьяс котырӧн юрнуӧдысь коми гижысь Елена Васильевна Козловакӧд ёрта сёрниысь, кодӧн и воссьӧ июль тӧлысся номер.
* * *
Овтӧм керкалӧн резьдӧм шудӧн
Важыс видзӧдӧ выль олӧм вылӧ.
Кадлӧн гытсаныс — вылӧ-улӧ,
Енэж пыдӧсӧдз дзуртӧм кылӧ.
«Пуяс вужъясьӧны енэжас…»
Енэж пыдӧсас олӧ шонді,
Тӧлӧн пукталӧм лэчкысь мынӧм,
Ловъяс личӧдысь, сьӧлӧм шонтысь,
Сӧмын гытсаныс — улӧ-вылӧ.
Овтӧм керкалысь киссьӧм олӧм
Уна олысь ас сьӧлӧмас нуӧ,
Сӧмын тулысыс быд во волӧ,
Мед кӧ гытсаныс — улӧ-вылӧ.
Тайӧ кывбурыс том поэтлӧн, коді таӧдз эз на йӧзӧдчыв «Войвыв кодзув» журналын. Май тӧлысьын Клавдия Касеева ыстіс журналӧ ассьыс кывбуръяссӧ видзӧдлӧм могысь, шогмасны-ӧ. И со, Клавдиялӧн кывбур чукӧр петӧ нин журнал лист бокъяс вылын.
Иван Ногиев вӧзйӧ милицияын уджалысьяслӧн служба йылысь нюм петкӧдлан «Ас морт вӧлӧма» висьт.
* * *
Бӧрдӧ гудӧкыс кодлӧнкӧ, кылӧ,
Шоныд гожӧмлӧн лӧниник войӧ.
Зэв нор гӧлӧсӧн нывбаба сьылӧ,
Йиджӧ сьӧлӧмӧ пыдзыртан дойӧн.
Муса мортӧй пӧ муніс и вошис,
Кор пӧ кыйсьыны пармаӧ кайис.
Гашкӧ, косявліс сійӧс нин ошкыс,
Сысянь юӧр пӧ некод эз вайлы.
Асъя кыаӧдз гудӧкыс бӧрдіс,
Весиг нормӧдіс узьысь на грездӧс.
Шылад ю весьтті лэбис и вӧрті…
Мича югыдыс бӧрддзӧмысь мездіс.
Александр Уляшев «Ме тані коркӧ чужи…» кывбур чукӧрӧн петкӧдчӧ июль тӧлысся номерын.
Владимир Васильевич Тиминлысь кывбура да прозаа гижӧдъяссӧ «Олӧмсӧ радейтысь, чужан му вӧсна тӧждысьысь…» статьяын видлалісны Татьяна Кузнецова да Анастасия Малева.
Лоӧ мукӧдтор и та кындзи. Лыддьысьӧй, бурмӧдӧй сьӧлӧмнытӧ.