Июнь тӧлысся номер восьтӧ Олег Уляшевлӧн «Тыр да Тор» кывбур чукӧр. Поэзия радейтысьяслы, дерт жӧ, сійӧ лоас лов сертиыс.
Олӧм дозйыд чукъя кӧ,
Кондышт водзӧ.
Лышкыд мортлӧн кушмывлӧ
Пӧртйыс шоча.
Тыра-Тора вокъясыд
Нэмсӧ гозйӧн
Уськӧдчӧны отсавны
Тыртны дозъяс.
Чукъя шудӧс кондышті
Торъя пӧртйӧ,
Джынъя пӧрттӧ отсышті
Тырӧ пӧртны.
Со сэтысь нӧшта ӧти кывбур:
Улын — толаяса кымӧр.
Лэбӧ «суперджетӧн» йӧз.
Нагай-лэбач вундӧ сынӧд.
Улын — мойд, и вылын — мойд.
Мойдыс час-мӧд ещӧ кыссяс.
Сыысь кольӧм гоз-мӧд войт
Сэсся бӧрас вӧткӧд кысяс.
Ассьыс шевкнитлас кӧ борд,
Самолёттӧг, «суперджеттӧг»,
Вӧтӧн лэбзяс быдмӧм морт:
Кыпыд лолыд ачыс лэптӧ.
Ыджыд вуджӧдчан удж бара а вӧчӧма Евгения Удалова. Тайӧ номерын сійӧ вӧзйӧ тӧдмасьны финн драматург да гижысь Энсио Рислаккилӧн «Мисьтӧм Эльза» пьесаӧн.
Ылӧ бӧрӧм кольӧм кадъяс радейтысьяс вермасны водзӧ лыддьыны Михаил Лебедевлысь «Великӧй Перымлӧн бӧръя лунъяс» историческӧй повесьтсӧ.
А сигӧртӧ номерсӧ редакцияӧ воӧм письмӧ: «Видза оланныд «Войвыв кодзув» журнал лӧсьӧдысьяс! Вӧрзьӧдіс сьӧлӧмӧс Алексей Полугрудовлӧн февраль тӧлысся номерын лыддьысьысь дорӧ шыӧдчӧмыс, да окота лои гижыштны журнал поштаӧ…»
Эм и нӧшта на гижӧдъяс.
Лыддьӧй, бурмӧдӧй ловнытӧ. Номер петас июнь 25 лунӧ. А редакция уджалӧ нин июль тӧлысся номер вылын. Энӧ вунӧдӧй гижӧдчынытӧ.