Эм Емдін му вылын ичӧтик шондіа ді — дас куим сиктгрезда От гӧра. Сэтчӧс муса Семуков сиктын, Антонина Васильевна да Мисаил Васильевич Матвеевъяслӧн крепыд шуда семьякотырын и мойвиліс мем чужны гажа да кыпыд май 21 лунӧ. Мамсянь баб серти лоа Миш Пиль Вась Августа Полинарья Тоня Надежӧн, дедсянь — Сав Вань Вань Вась Тоня Надежӧн. Батьсянь баб серти — Спир Микол Маль Мисаил Надеж, дедсянь кӧ лыддьӧдлыны, лоа Мӧсь Ыджыд Вань Вась Мисаил Надежӧн.
Тадзи заводитӧ висьтасьны ас йывсьыс Надежда Павлова, коді май тӧлысьын пасйӧ чужан лун, тшупӧда пас тырӧм. А кутшӧм висьтасьӧм бур ёрттӧг? Надежда Павловалысь олӧм-вылӧмсӧ юасис-пасъяліс Анжелика Елфимова. Налӧн ёрта сёрни да Надежда Мисаиловналӧн выль кывбур чукӧр и восьтӧны май тӧлысся номер.
Вӧрын вотчигӧн тешкодь лоӧмтор йылысь лыддьӧй Альбина Бушеневалӧн «Самолётӧн» висьтысь.
Победалӧн би
«Ми ёнмыны, буракӧ, кутім,
Оз сэтшӧма луныс нин варт,
Да коркӧ и матыстчас шудыс,—
Победалӧн шуис салдат.
— Ми ягвывсаяс, ми вадорсаяс,
Да чужанін вичмӧдӧ вын.
Тан абу ӧд тас, тан ставыс ӧд ас,
Тан быдса быд морт, абу джын.
А ёна ӧд гажтӧм нин вӧлі,
Кор кӧдзавны кутліс страна.
Йӧз пыжӧ ми быттьӧкӧ сӧлім
Да ма пыдди панялім ва.
Но сё пӧв ӧд сьӧкыдджык вӧлі,
Да вӧрӧгсӧ пасьвартім ми.
И тіян мед ыпъяліс сьӧлӧм,
Век ӧзйис Победалӧн би».
Быд во май тӧлысь нималӧ Ыджыд Победаӧн. Василий Лодыгин лӧсьӧдіс кыпыд, Айму дорӧ муслуна кывбур чукӧр, кодіс и вӧзйӧ лыддьысьысьлы.
Сыктывкарса архивын дыр уджалӧм-корсьысьӧм бӧрын Мария Плоскова дасьтіс ыджыд статья аслас мужичӧй рӧдвуж йылысь, кодъяс дорйисны миянлысь Рӧдинанымӧс. Быдпӧлӧс судьбаыд тай паныдасьлӧ Ыджыд война вылӧ мунӧм бӧрын, да тадзи и шуӧма статьясӧ Мария Алексеевна: «Мунісны, дорйисны, усисны, вошисны, локтісны… батьяс, вокъяс, пиян…»
Ӧшкамӧшка
Кымӧръясӧдз лыбӧ пос.
Кодкӧ каяс али оз?
Мамыс — шонді, батьыс — зэр.
Сылӧн сизим рӧма сер.
Шонді кӧчӧс корӧ: «Лок,
Менам вильыш ичӧт вок!
Керка ӧшиньясӧ пыр,
Мед оз узьны челядь дыр.
Коді медся смел да шань —
Кыпӧда ме енэжлань!»
Эм май тӧлысся номерын и миян медся дзоля лыддьысьысьяслы лист бокъяс. Анастасия Сукгоевалӧн петӧ «Сизим рӧма сер» кывбур чукӧр. Аслас кывбуръяс дорӧ автор вӧчӧма мича серпасъяс.
Мукӧдтор эм и та кындзи. Сӧмын лыддьысьӧй.