Май 9 лунӧ пасйим миян историяын медся тӧдчана гаж – Айму вӧсна Ыджыд тышын Вермӧм лун! Войнаыс муніс пӧшти вит во – 1.418 лун да вой. Сьӧкыд, вывті сьӧкыд вӧлі тышкасьны бура дасьтысьӧм вӧрӧгкӧд, коді чайтіс эштӧдны войнасӧ некымын тӧлысьӧн. Но эз збыльмы фашистъяслӧн кӧсйӧмыс. Резьдіс-вальдіс Гитлерлӧн «Барбаросса» планыс. Тувсовъя сьӧдасьӧм лым моз сійӧ бырис, йиджис кокувса пӧтшвааныс.
Уна сикт-грездын войнаса ветераныс эз нин коль, да и налӧн дӧваясыс, тылын уджалысьяс, да челядьыс арлыдаӧсь нин. Унаӧн ас йӧрсьыныс ылӧджык оз нин петавлыны.
Но ӧд быдмӧ подув вӧрыс, код вылӧ водзӧ олӧмас миян став лачаыс. Кыдзи найӧс велӧдам, сетам мывкыд-тӧдӧмлун, сӧвмӧдам, путьмӧдам торйӧдны бурсӧ лёксьыс, пыдди пуктыны бать-мамӧс, матыссаӧс – сэтшӧм олӧм и виччысьӧ миянӧс водзӧ вылӧ.
Тыш-кось бӧрын шойччысь «салдатъяс» нимсянь чолӧмалам «Коми му» газет лыддьысьясӧс кольӧм праздникӧн. Медым юр весьтаныд пыр вӧлі шондіа, сэзь енэж, а лов выланыд кыпыд!
Владимир Шомысов.