Печора йывса Ылыдздінысь Николай Алексеевич Мезенцев мунӧма фронт вылӧ 1942 вося февраль 2 лунӧ. Юӧртӧг вошӧма сійӧ жӧ вося июнь 28 лунӧ Ступино вывтасін вӧсна чорыд тыш дырйи.
Юӧртӧг вошӧма… 2020 вося август 21 лунӧ Великие Луки карысь «Штурм» корсьысян отрядса поискӧвикъяс (командирыс Валерий Гудков) Ступино вывтасінсянь неылын «кыпӧдӧмаӧсь» салдатӧс.
Сылӧн медальонысь аддзӧмаӧсь гижӧд: кула кӧ пӧ, юӧртӧй та йылысь Коми АССР-са Мылдін районысь Ылыдздін сиктӧ мамлы, Клавдия Константиновна Мезенцевалы.
Тайӧ гижӧдыс и отсаліс туявны салдатлысь ним-вич-овсӧ.
Апрель 23 лунӧ рядӧвӧй Мезенцевӧс гуалісны Мылва посёлокса шойнаын. 2005 восянь поискӧвикъяс вайисны Комиӧ война дырйи юӧртӧг вошӧм да уна дас во мысти «кыпӧдӧм» 20 салдатлысь шойсӧ.
Николай Алексеевич и лоис кызьӧднас. Найӧ эз вошны юӧртӧг. Чужан му вӧсна тышын усины!
Мылдінын «Некодӧс абу вунӧдӧма и нинӧм абу вунӧма» мемориал дорын чукӧртчисны сиктын олысьяс, тшӧтш и салдатлӧн рӧдвужыс. Анна Семёновна Власовалӧн юрнуӧдӧм улын краеведъяс аддзӧмаӧсь Николай Алексеевичлӧн рӧдвужысь дас кык мортӧс.
А.Н.Попов нима историко-краеведческӧй музейын аддзысьлігӧн найӧ шуӧмаӧсь дзебны салдатӧс Мылваын.
Апрель 23 луныс тӧла, ыркыд вӧлі.
Буретш Печора ю воссис, йи кылавны кутіс. Митинг вылын сёрнитісны Мылдін районса администрацияӧн веськӧдлысь Алексей Целищев, военнӧй комиссар Артём Паценко, Псков обласьтысь Великие Луки карса администрацияӧн юрнуӧдысьӧс вежысь Руслан Сукманов, «Штурм» отрядысь боеч Вадим Горбачёв, Комиысь поискӧвикъяслӧн «Звезда» да «Наследие» отрядъясса командиръяс Валентина Жигалова да Сергей Таскаев. Быдӧн на пиысь казьтыштіс, кутшӧм ыджыд дон ми веш-тім, медым венны фашистъясӧс, шедӧдны Победа.
Салдатлӧн рӧдвуж нимсянь сёрнитіс Улыс Омра посёлокысь Ольга Фёдоровна Уралова.
Сійӧ сьӧлӧмсяньыс аттьӧаліс Великие Луки карсаӧс, мый кузь туй вылӧ видзӧдтӧг вайисны усьӧм воинлысь шойсӧ чужанінас. Ыджыд Вермӧмсянь 76 во мысти рядӧвӧй Николай Алексеевич Мезенцев бергӧдчис пӧ гортас.
Мылдінын митинг бӧрын машинаяс мӧдӧдчисны 12 километр сайын меститчӧм Мылваӧ. Шойна вылын салдатӧс сьылӧдіс Войвож посёлокса вичкоысь отеч Владимир Канев.
Военнӧй комиссар сетіс Н.А.Мезенцевлӧн рӧдвужлы Россияса флаг. Горт вылас разӧдісны салдатлӧн бӧръя тыш мунанінысь вайӧм да мамыслӧн гу вылысь босьтӧм му. Дзебигӧн салдатлы салюталісны автоматысь куимысь лыйӧмӧн.
«Печора» гостиницаын Николай Алексеевич Мезенцевӧс пызан сайын кодралігӧн Мылдін районса администрациясянь аттьӧалана гижӧдъяс сетісны Великие Луки карысь воӧмаяслы, сиисны налы дзоньвидзалун да шуисны, водзӧ пӧ нуӧдӧй корсьысян уджтӧ.
Сергей Владимиров.
Мылдін р.