Кӧрткерӧс районса Шойнатыысь Марат Пурлушкин ас киӧн чукӧртӧма гоночнӧй машина. Та йылысь сійӧ юӧртіс меным гоз-мӧд лун сайын.
Казьтыштам, сиктса Кулибин йылысь «Коми му» газетын паськыда гижлім тавося январын. Сэки Марат Пурлушкин висьтавліс аслас кӧсйӧм йылысь, мый окота журъялыштны гоночнӧй машинаӧн. Дерт пӧ, «Формула 1»-ӧ ӧдвакӧ пырӧдча, но «тэрыб вӧвсӧ» вӧча ачым. Заводитӧма нин вӧлі чукӧртны детальяссӧ.
–Таво гожӧмнас кӧсйи чукӧртны, но ӧдйӧджык артмис, – нимкодьпырысь юӧртіс Марат. – Рамасӧ кӧрт трубаясысь свариті, бӧръя осьыс кӧрт прутъясысь. Бӧръя гӧгыльяссӧ да двигательсӧ судзӧді, пуклӧсыс – офисысь улӧс, водз рамаыс да гӧгыльыс – пилӧн «Олимпиец» важ велосипедысь. Выль техникасӧ сэсся «Олимпик-2»-ӧн и нимті.
«Тэрыб вӧвнас» Пурлушкинлӧн став семьяыс ветлӧ. Гижлім нин, мый Марат керка йӧрас картупель му пасьталаыс каток вӧчӧма. Йи кузяыс и журъялӧны. Медводз, дерт, кӧзяиныс пуксьӧма руль сайӧ. Висьталӧ, сьӧлӧмыд пӧ радлӧ, кор шыбльӧдлӧмӧн ижъялан.
–А пӧран кӧ? – юася сылысь.
–Он! Гӧгыльясыс шипаӧсь, а водз гӧгыляс саморезъяс гартлі. Бура кутчысян йизьӧминад, – вочавидзис Марат Мирсеидович.
Локтан тӧв кежлӧ пӧ «восьмёрка трасса» йизьӧда. Сэті пӧ нӧшта на лӧсьыдджык лоӧ журъявнысӧ. Ӧні пӧ каток вылас онджык вермы ӧддзӧдчыны, кыдзи лолыд корӧ. А сідзсӧ гоночнӧй машинаыс тэрыб. Часӧн пӧ 70 километр ӧдсӧ лэптӧ.
Сідзкӧ, зарни киа мортлӧн ас вӧчӧм техникаыс гаражас содіс. Ас киӧн жӧ чукӧртӧма ичӧтик трактор, кодӧн вӧдитчӧ овмӧсас, а ӧні со гоночнӧй машина. Но и водзӧ на мӧвп эм, мыйӧн Марат Мирсеидович водзвыв юксьыны эз кут.
Екатерина МАКАРОВА.