Бур сьӧлӧмӧн

Тадзи шусьӧ «Коми му» газет редакциялӧн социальнӧй тӧдчанлуна выль уджтас. Сійӧс збыльмӧдны шуӧма 2019 во помӧдз.

Проектлӧн могыс – отсавны ветеранъяслы, олӧма да вермытӧм йӧзлы разьны олӧмас «гӧрӧдъяс», дорйыны найӧс тшӧтш и право боксянь, специалистъяслӧн гӧгӧрвоӧдӧмӧн.

Буретш олӧма да вермытӧм йӧзлы талун оз тырмы матыссасяньыс да орччасяньыс шоныд-небыдлуныс, гӧгӧрвоӧмыс, отсӧгыс. А ӧд ыджыд арлыда да инвалидносьта войтырлы медся сьӧкыд венны быдсикас сьӧкыдлунсӧ, кӧть эськӧ пырджык «гӧрӧдъясыс» кокниа разьсьӧны. «Коми мулысь» «Бур сьӧлӧмӧн» уджтассӧ веськӧдӧма буретш тайӧ йӧзыслы отсалӧм вылӧ.

И сідз, талунсянь ми виччысям тіянсянь, газет лыддьысь-судзӧдысьяс, майшӧдлана юалӧмъяс кузя шыӧдчӧмъяс.

Юалӧмӧн шыӧдчыны миян дорӧ позьӧ некымын ног.

Ӧти-кӧ, ыстыны письмӧ «Россияса пошта» пыр 167982, ГСП-2, Сыктывкар, Карл Маркс уличаса 229-ӧд номера керка, «Коми му» газет редакция адрес серти.

Мӧд-кӧ, ыстыны smi-komimu@mail.ru электроннӧй адресӧ юӧр.

Коймӧд-кӧ, шыӧдчыны «Коми йӧзӧдчан керкалӧн» да «Коми му» газетлӧн «ВКонтактеын» лист бокъясӧ.

Нёльӧд-кӧ, звӧнитны 8(8212) 20-19-36, 24-15-93 либӧ 24-01-16 телефонъяс пыр.

Став воӧм юалӧмсӧ ми видлалам да вочакыв сетӧм могысь шыӧдчылам отсӧг-гӧгӧрвоӧдӧмла лӧсялана министерство-ведомствоӧ: Коми Республикаса удж, занятосьт да социальнӧя доръян, йӧзлысь дзоньвидзалун видзан, пы-тшкӧсса делӧяс министерствоясӧ, Россия Федерацияса Пенсия фондлӧн Коми юкӧнӧ, регионын мортлысь право дорйысь уполномоченнӧй, Общественнӧй палатаӧ пырысьяс дорӧ, вермытӧмъяслӧн республикаса котырӧ да мукӧдлаӧ.

Таысь ӧтдор, проект серти шуӧма котыртлыны аддзысьлӧмъяс Максаковкаса бурдӧдчан шӧринын, олӧмаяслы да вермытӧмъяслы Тентюковса керка-интернатын да мукӧдлаын, ӧд син на син кокньыдджык юксьыны шог-дой-майшасьӧмнад. А газетын уджалысьяскӧд воӧм специалистъяс места вылын нин вермасны лючки-бура ставсӧ гӧгӧрвоӧдны шыӧдчысьяслы.

Став юалӧм вылӧ вочакывсӧ кутам йӧзӧдны газетын, медым кыдз позьӧ унджыкӧн тӧдмалісны, кыдзи разьны татшӧмсяма «гӧрӧдсӧ», код дорӧ шыӧдчыны отсӧгла пикӧ воигӧн.

Ӧти кывйӧн, бур сьӧлӧмӧн ставсӧ венам! Виччысям тіянсянь юӧръяс!

«Коми му» газетысь, кодӧс позьӧ судзӧдны пошта пыр, позьӧ ньӧбны «Ордым» лавкаын. Медым лыддьыны электроннӧй версия, личкӧй татчӧ. Эмӧсь кӧ юалӧмӧяс, гижӧй komi-kerka@ya.ru.

Бур сьӧлӧмӧн

«Коми му» газетысь, кодӧс позьӧ судзӧдны пошта пыр, позьӧ ньӧбны «Ордым» лавкаын. Медым лыддьыны электроннӧй версия, личкӧй татчӧ. Эмӧсь кӧ юалӧмӧяс, гижӧй komi-kerka@ya.ru.

Пролистать наверх