Кавказын, Европа да Азия ӧтлаасянінын, меститчӧма неыджыд канму – Армения, вӧвлӧм сӧветскӧй республика, а ӧні асшӧр страна. Тайӧ лунвыв муас олӧ матӧ 3 миллион морт, но эм сэтчӧс войтыр, кодлӧн мӧд чужаніннас лои Войвыв – Коми Республика. Медым кутны вужъяскӧд топыд йитӧд, сёрнитны ас кывйӧн, сӧвмӧдны да вуджӧдны челядьлы культура да традиция йылысь тӧдӧмлун, котыртӧма «Россияса армяналӧн союз», эм тайӧ ӧтмунӧмыслӧн и Коми юкӧн. Буретш сы бердын уна во чӧж нин уджалӧ томуловлӧн комитет.
Мыйӧн олӧ том армянаяслӧн комитет – «Йӧлӧга» газеткӧд юксисны сэтчӧс водзмӧстчысьяс: «Аракс» йӧктан котырысь Лиана Месропян да Рубен Данелян, а сідзжӧ комитетӧн веськӧдлысь Саргис Хачатрян.
Зумыд подув
Сыктывкарын олысь ичӧт армяна кыв да культура туялӧм-велӧдӧмын медводдза воськовъяс вӧчӧны вӧскреснӧй школаын на. Буретш татысь и петӧмаӧсь томуловлӧн комитетын кызвын водзмӧстчысьыс.
– Чужлі Сыктывкарын, и медым пыдісяньджык велӧдны чужан кыв, сизим арӧсын пыри велӧдчыны вӧскреснӧй школаӧ. Семья костын армян кывным быдлунъя, а школаын эм позянлун велӧдчыны мичаа сёрнитны литературнӧй кывйӧн, пырӧдчыны историяӧ да культураӧ, – висьталӧ Лиана. – Ветлӧдлі сэтчӧ бура дыр, 14 арӧсӧдз. А кольӧм во вӧзйыси комитетӧ, кӧть и эз дзик пыр, но босьтісны жӧ, ӧні «Араксын» йӧкта.
Рубен тшӧтш ветлӧдлӧма воскреснӧй школаӧ, но чужан кыв да культура сӧвмӧдӧмын уджлысь, ас войтыркӧд топыда ёртасьӧмлысь тӧдчанлунсӧ гӧгӧрвоӧма быдмыштӧм бӧрас нин.
– Чайта, мый кутны йитӧд ас культуракӧд – тайӧ коланатор, быд войтырлӧн ӧд эмӧсь аслыспӧлӧс традицияяс, бать-мам, пӧль-пӧчсянь вуджӧм тӧдӧмлун, индӧдъяс. И кор сёрнитан, олан ӧтгудыр аскоддьӧмыдкӧд, лӧсьӧдан и олӧм вылӧ видзӧдластӧ, мый подулын – уна нэмся традиция да культура, – юксьӧ видзӧдласнас Рубен. – Вочасӧн гӧгӧрвои, мый армяна меным матыссаӧсь лов, сідз шусяна менталитет сертиныс.
Дерт, ставыс пансьӧ семьясянь, гортаныс армяна сёрнитӧны чужан кывнас, велӧдӧны пыдди пуктыны и кывсӧ, и традицияяс. А томулов тӧдчӧдӧны, мый ӧта-мӧдсӧ лыддьӧны ыджыд семьяӧн, и ас водзаныс ӧнісянь пуктӧны мог – отсавны сӧвмыны ичӧтджыкъяслы.
Быдмысь войтыр аддзӧ олӧмысь, ӧтуввезйысь уна бурсӧ и лёксӧ, и налы колӧ пример, морт, код вылӧ видзӧдӧмӧн кага вермас бӧрйыны ассьыс олан туй, велӧдчыны торйӧдны бурсӧ лёксьыс, овны кывкутӧмӧн.
Аддзысьлӧм-гаж да ӧтув удж
Армяналӧн ыджыд котыр нуӧдӧ уна сикас мероприятие. Медыджыд татшӧм аддзысьлӧмнас лоӧны «Армянскӧй культура лунъяс». Томуловлӧн комитет пуктӧ гаж котыртӧмӧ ыджыд пай, но, гашкӧ, медся яръюгыдӧн, тӧдчанаӧн лоӧны «Аракс» йӧктан котырлӧн петкӧдчӧмъясыс (Аракс – тайӧ Арменияын визувтысь ю, канмуын медся кузьыс). Енбиа томулов пуктӧны уна вын, медым йӧктӧмыс вӧлі збыльысь традиционнӧй, видзӧдӧны видео, на подулын асьныс лӧсьӧдӧны хореография. Петкӧдчӧмъяс сетӧны позянлун паськӧдны армяна олӧм, история йылысь юӧр, унджык йӧзӧс тӧдмӧдны тайӧ лунвыв муыслӧн озыр культураӧн.
Медыджыд озырлун
Комитетын быдӧн вермас аддзыны ас окота серти нырвизь. Творчество кындзи томулов водзмӧстчӧны спортын, волонтёрствоын, уджалӧны комитет бердын и велӧдан да юӧр сетан юкӧнъяс.
Саргис Хачатрян юрнуӧдӧ комитетӧн 2017 вося сентябрсянь, а таӧдз пырӧдчис котырлӧн удж кыдзи и мукӧд ёртыс.
– Томулов пӧвстын водзмӧстчысьыс уна, аддзысьлӧмъяс дырйи (а чукӧртчылам ми быд шойччан лунӧ) ставныс пуктӧны ӧтув уджӧ ассьыныс пай, вӧзйӧны выль мӧвпъяс, отсалӧны ӧта-мӧдлы, – висьталӧ Саргис. – Комитетӧ пыр локтӧны выль йӧз, а найӧ, кодъяс аддзисны ассьыныс радейтана
мортсӧ, лӧсьӧдӧны семья – водзӧ мунӧны олӧмӧд, уджалӧны, миянкӧд йитӧдсӧ тшӧтш кутӧны, волӧны аддзысьлӧмъяс вылӧ. Тайӧ ёртасьӧмыс – ныв-зонъяслы медся донатор, чукӧртчылӧмъясыс пӧ век шоныдӧсь, аслыспӧлӧс кыпыд руаӧсь. Ӧтгудыр сьылӧм-йӧктӧмӧн кольӧны и гажа нимлунъяс, кафе-ресторанӧ ветлӧмъяс, кар кузя гуляйтӧм.
Армяна томулов, кыдзи и мукӧд тшӧтшъяыс, велӧдчӧны да уджалӧны, шойччӧны, пырӧдчӧны общественнӧй олӧмӧ. Со, шуам, Рубен радейтӧ баскетбол да бокс, зільӧ пырӧдчыны быдсикас образовательнӧй форумӧ, уджалӧ баристаӧн, а Лиана школаын велӧдчӧм кындзи сӧвмӧдӧ енбисӧ, радейтӧ бальнӧй йӧктӧм, сьылӧ. А комитет сетӧ позянлун видлыны вын выль нырвизьын, велӧдчыны
пуктыны ас водзын могъяс да пӧртны найӧс, тӧдмасьны оз сӧмын ас, но и уна мукӧд национальностя войтыркӧд, пыдди пуктыны и асьтӧ, и мукӧдӧс.
Сёрнитіс Мария ИГУШЕВА.
Снимокъясыс авторлӧн да «Россияса армяна союзлӧн» Коми юкӧнбердса томулов комитетлӧн.