«Монди Сыктывкарса ЛПК»-сянь да «Сила добра» фондсянь зэв колана выльвося козин вичмис Сыктывкарысь нёль арӧса Даша Помысовалы.
Нывкалӧн чужӧмсяньыс генетика торксьӧм – Ли синдром, мый вӧсна сійӧ зэв ичӧтик да висьлӧс. «Сила добра» фондын Дашаӧс нимтӧны Дюймовочкаӧн.
Татшӧм висьысьясыс вочасӧн омӧльтчӧны, юр вем уджыс торксьӧ, но нывкалӧн бать-мамыс да ыджыдджык вокыс вӧчӧны став позянасӧ, медым Даша дыр на колис тыр-бурӧн. Отсалӧ налы таын и «Сила добра» фонд. Луннас ӧти час кагук пырӧдчӧ физкультура сора творчествоа занятиеясӧ – серпасасьӧ да ки помысь вӧчасьӧ.
–Даша зэв ёна радейтӧ фондӧн котыртан занятиеяссӧ, окотапырысь локтӧ татчӧ, лӧсьӧдчӧ рытсяньыс нин, – висьталӧ Александра мамыс. Сылӧн кывъяс серти, нывка сьӧлӧмсяньыс серпасасьӧ, лепитчӧ, вӧчӧ мукӧд кипом удж.
Бӧръя кадас Дашалы колӧ дона оборудование, сьӧкыд лолавны-тшӧкъявнысӧ да. Ньӧбны сійӧс вермисны «Сила добралӧн» важся бур ёрт «Монди Сыктывкарса ЛПК» отсӧгӧн.
Комбинат отсасьӧ фондлы сьӧмӧн оз нин медводдзаысь, а 2018 восянь предприятиеын эновтчисны уджъёртъясыслы выльвося бизнес-козинъяс ньӧбӧмысь да вичмӧдӧны та могысь урчитӧм сьӧмсӧ бур вӧчан удж вылӧ. Та весьтӧ 2018 воын отсалісны Слава Бервальдлы, 2019-ӧдын «Монди Сыктывкарса ЛПК» отсӧгӧн могмӧдісны колана оборудованиеӧн челядьлы республикаса больнича.
Та пӧрйӧ предприятиеса генеральнӧй директор Клаус Пеллер сетіс Помысовъяслӧн семьялы 750 сюрс шайт дон сертификат.
Тайӧ сьӧм вылас ньӧбасны ты весалан-сӧстӧммӧдан да сынӧдысь кислород перъян-чукӧртан аппарат, МЕШ-небулайзер да вирын кислород туялан пульсоксиметр.
–«Сила добра» фондын зільӧны мойдвывса кодь йӧз, кодъяс водзмӧстчӧны мукӧдысь торъялана удж-нокын. Найӧ вӧчӧны сэтшӧмтор, мый мукӧдыслы абу вын сертиыс, – пасйис Клаус Пеллер да тӧдчӧдіс, кута пӧ лача, оборудование отсӧгӧн Даша водзӧ на лоас нимкодьӧн да вильышӧн.
«Сила добра» фондӧн веськӧдлысь Аэлита Барышева серти, талун медшӧр могыс – нюжӧдны Дашалы кадсӧ. Оборудованиеыс отсалас тайӧс вӧчнысӧ. А сэсся, гашкӧ, и висьӧмсӧ бурдӧдан туйвизь сюрас:
–Ми век кутам лача, мый кад мысти бурдӧдысьяс аддзасны нёрпалӧмсӧ венанног. Таӧ жӧ эскӧны и фондлы отсасьысьяс.