Комын во сайын Комиын вӧлӧма вужвойтырлӧн медводдза съезд. Такӧд йитӧдын Владимир Уйба чолӧмалана кывйӧн шыӧдчис республикаын олысьяс дорӧ.
–Коми войтыр медводдзаысь чукӧртчылӧмаӧсь асланыс съезд вылӧ Сыктывкарын 1991 вося январь 11-13 лунъясӧ. Волӧма 420 гӧгӧр делегат. На лыдын вӧлӧмаӧсь нималана гижысьяс, учёнӧйяс, журналистъяс, общественнӧй котыръясын водзмӧстчысьяс. Медводдза съездлӧн кывкӧртӧд-индӧдъясыс лоӧмаӧсь аслыссяма программаӧн, коми национальнӧй котырлӧн водзӧ вылӧ туйвизьӧн.
И сэксянь коми войтырлӧн съездъяс да кар-районса быдвося конференцияяс дырйи пыр кыпӧдлісны республикаын экономика, социальнӧй юкӧн да этнокультура сӧвмӧдӧм йылысь медшӧр юалӧмъяс.
Но медся тӧдчанаыс сыын, мый делегатъяс оз сӧмын сёрнитны йӧзӧс майшӧдлана тӧжд-мог йылысь, а вӧзйӧны сьӧкыдлунъяссӧ венан туйяс да тшӧтш и асьныс водзмӧстчӧны такӧд йитӧдын, – пасйис Комиын юралысь Владимир Уйба.
* * *
Республикаын коми войтырлысь медводдза съезд нуӧдӧм йылысь мӧвпсӧ вӧзйылӧма «Коми котыр» общественнӧй котыр, и власьт тэчасъясын тайӧс ошкӧмаӧсь. Оргкомитетӧн юрнуӧдны босьтчӧма Коми АССР-са Министръяслӧн Сӧветӧн веськӧдлысь В.И.Худяев.
Республикаса телевидение петкӧдлӧма чукӧртчылӧмсӧ веськыд эфирын, и зэв унаӧн сійӧс видзӧдӧмаӧсь. Съездыслӧн вӧлӧма ыджыд тӧдчанлун, сійӧс пыдди пуктӧмаӧсь тшӧтш и сы вӧсна, мый тайӧ чукӧртчылӧм дырйиыс асланыс мӧвп-видзӧдласӧн юксьӧмаӧсь нималана йӧз: гижысьяс Г.А.Юшков, В.В.Тимин, Б.Ф.Шахов, ютыръясысь чинаяс В.С.Осипов, А.С.Безносиков, журналист В.И.Осипов, национальнӧй котыръясӧн веськӧдлысьяс В.Ф.Канев да А.К.Конюхов.
Съездлӧн уджӧ ыджыд пай пуктӧмаӧсь учёнӧйяс А.А.Попов, А.Ф.Сметанин, Г.Г.Бараксанов, Е.А.Цыпанов, К.С.Королёв, Э.А.Савельева. Коми наука шӧринысь Кыв, литература да история институтӧн веськӧдлысь А.Д.Напалковлӧн юрнуӧдӧм улын дасьтӧмаӧсь съездыслысь медшӧр документъяссӧ, та дырйи подуласьӧмаӧсь Коми АССР-ын национальнӧй йитӧдъяс бурмӧдӧм кузя КПСС обкомлӧн пленум вылын водзтіджык вынсьӧдлӧм уджтас вылӧ.
Коми войтырлӧн медводдза съездлӧн исполнительнӧй тэчасӧн лоӧма Коми войтырӧс сӧвмӧдан комитет (талун тайӧ уджсӧ вӧчӧ «Коми войтыр» регионъяскостса общественнӧй котыр). Веськӧдлысьнас бӧрйӧмаӧсь В.П.Марковӧс.
Кольӧм каднас республикаын нуӧдӧмаӧсь коми войтырлысь дас кык съезд. Бӧръяыс вӧлі кольӧмвося февральын.