Ассьыным тайӧ радейтана праздникъяссӧ ми быд во пасъям семьянымкӧд, рӧдвужнымкӧд, ёртъяснымкӧд. Ӧнія сьӧкыд кадӧ миянлы торйӧн нин ёна колӧ тӧждысьны матыссаясным вӧсна. Эз кокни вӧв тайӧ воыс. Став мир пасьталаын лоӧмторъяс понда уналы ковмис вежны олӧм вылас видзӧдлассӧ, пыдісянь мӧвпыштлыны, кыдзи видзны ассьыныс да орччаясыслысь дзоньвидзалунсӧ, вежны водзӧ вылӧ дум-кӧсйӧмнысӧ да кад кежлӧ дугӧдчывны тӧдчана могъяс збыльмӧдӧмысь.
Ме кӧсъя аттьӧавны тіянӧс сыысь, мый бӧрӧ кольӧм воас став сьӧкыдлун вылас видзӧдтӧг водзӧ зіля уджалінныд республикалы да ставнас страналы бур вылӧ. Торйӧн нин ыджыд аттьӧ висьтала медицина юкӧнын уджалысьяслы, волонтёръяслы, ставныслы, кодъяс асьнысӧ жалиттӧг тышкасьӧны-водзсасьӧны коронавируса пандемиялы паныд.
Таво тыри Айму вӧсна Ыджыд тышын Вермӧмсянь 75 во. Став сьӧлӧмсянь аттьӧала миянлысь дона ветеранъясӧс, кодъяслӧн водзмӧстчӧм вылӧ видзӧдӧмӧн ми зілям венны став сьӧкыдлунсӧ.
Дона ёртъяс! Выль восӧ ми пыр виччысям бурас лача кутӧмӧн. И мед 2021 воыс ваяс быдӧнлы гортас став югыдсӧ, шудсӧ да ладсӧ! Сьӧлӧмсянь сиа тіянлы крепыд дзоньвидзалун, быд бурсӧ да кыпыд оланру!
Владимир Уйба,
Коми Республикаса юралысь.