Бур лун, «Коми му» газет лыддьысьяс! Газетлысь тавося бӧръя петас дасьтігӧн Галина Макарова меным со мый тшӧктіс: Инесса, вӧч пӧ таво вылӧ кывкӧртӧд! И со мый менам артмис…
Ми лэдзам вит коми газет-журнал. Вӧчам тайӧс сьӧлӧмсянь. Со таво «Йӧлӧга» лоис журналӧн. Юӧр? Юӧр. Сьӧкыд коронавируса воӧ содтім 500 гижӧдчысьӧс быд газет-журналлы. Кыдзи? «Коми войтыр» ӧтмунӧмкӧд ӧтув зільӧмӧн котыртім школа-садъяслы да ӧтмунӧмын водзмӧстчысьяслы электроннӧй подписка.
Кыдз и кольӧм во, таво шедӧдім республикаса администрациялӧн сьӧм вылӧ куим грант. Выль проектъяс збыльмӧдӧны нин «Чушканзіын», «Йӧлӧгаын» да «Коми муын». Лыддьысьысьяслы – выль рубрика, а миян уджалысьяслы – содтӧд сьӧм, кодӧс абу кокни шедӧднысӧ.
Мӧд-кӧ, газет-журналысь ӧтдор лэдзам коми небӧгъяс. Таво пырӧдчим социальнӧй тӧдчанлуна литературалӧн гранта конкурсӧ кык небӧгӧн – Олег Уляшевлӧн да Анжелика Елфимовалӧн сборникъясӧн. 2021 воын дасьтам «Войвыв кодзув», «Би кинь» да «Йӧлӧга» журналъяслӧн тшупӧда паскӧд йитчӧм небӧгъяс. Куим юбиляр лоас!
Коймӧд-кӧ, кутам ас киын «Ордым» лавка. Миян тайӧ бизнес вылӧ коронавируслӧн «йӧлӧгаыс» тшӧтш мӧрччис. Абу кокни венны сьӧкыдлунсӧ, но эскам, ставыс лоас бур. Виччысям выльвося козинъясла! Волӧй!
Нёльӧд-кӧ, мӧд во нин збыльмӧ «Лок татчӧ» проект. Вузасям коми кывтэчаса футболкаӧн, толстовкаӧн, расчёскаӧн, ручкаӧн, стикерпакӧн да мукӧд посниторйӧн. Медшӧр могыс – коми кыв сӧвмӧдны-нимӧдны. А такӧд тшӧтш – «Ордым» кутны. Кольӧм во шӧрын гӧгӧрвоим, мый лавкаыс уджалӧ зэв ыджыд «минусӧн» да, колӧ тупкыны сійӧс либӧ кутшӧмкӧ выль вузӧс вӧзйыны. И вӧзйим! «Лок татчӧ» ньӧбӧ сійӧ, коді тӧдӧ коми кыв и коді оз тӧд коми кыв, коді олӧ Комиын, и коді оз ов Комиын.
Витӧд-кӧ, «Коми йӧзӧдчан керка» мӧдӧд во нин ловзьӧдӧ ӧтуввезлысь коми кывъя юкӧнсӧ. Абу кокни, но ми тайӧс вӧчам. Кольӧм во нин дасьтім komikerka.ru выль сайт. Медым корсьны сыӧн вӧдитчысь выль йӧзӧс, колiс аслыным неуна вежсьыны.
Мӧйму жӧ дасьтім «Син на син» уджтас. Веськыд эфирын гӧсьтъяскӧд сёрнитӧ миян журналист Антонина Микушева. Карантин дырйи тайӧ уджыс падмыштліс, сэсся кыдзкӧ бӧр ладмис. И талун таысь сідзжӧ воӧ миянлы содтӧд сьӧм. Реклама сетысьлы оз пыр лӧсяв коми газет-журналлӧн тиражыс, абу вывті ыджыд да, и тані миянлы отсалӧ веськыд эфир, кодӧс видзӧдысь-кывзысьыс зэв уна.
Мый артмӧ? Ми нимӧдам-сӧвмӧдам коми кыв, кӧть тайӧ уджыс абу кокньыд. И лача кута, ті тшӧтш водзӧ отсаланныд.
Локтан Выль воӧн, дона лыддьысьысь! Мед Ӧш воӧ ӧшлӧн кодь лоас дзоньвидзалунным, тайӧ миянлы ставнымлы медся колана.
Инесса ОРЁЛ,
«Коми йӧзӧдчан керкаӧн» веськӧдлысь.