Инвалидъяслӧн войтыркостса лунӧ Владимир Уйба аддзысьлӧма республикаын вермытӧмъяслӧн общественнӧй котыръясӧн веськӧдлысьяскӧд.
Регионса юралыськӧд сёрнитны волӧмаӧсь «Всероссийское общество инвалидов», «Всероссийское Ордена Трудового Красного Знамени общество слепых» да «Всероссийское общество глухих» котыръяслӧн Коми регионса юкӧнъясӧн веськӧдлысьяс Маргарита Колпащикова, Елена Попова да Сергей Мосеев.
–Миян медшӧр мог – вӧчны ставсӧ, медым вермытӧмъяслӧн вӧлі позянлун лючки овны да уджавны. Та дырйи ми бура гӧгӧрвоам, мый та могысь колӧ зільны вермытӧм йӧзӧс доръян общественнӧй котыръяскӧд ӧтув, – пасйӧма Владимир Уйба.
Инвалидъяслӧн общественнӧй котыръясӧн веськӧдлысьяс висьталӧмаӧсь медся ёсь тӧжд-мог йывсьыс, кодъясӧс регионса исполнительнӧй власьт тэчасъяслы нюжмасьтӧг колӧ пӧртны олӧмӧ.
Маргарита Колпащикова юӧртӧма, кыдзи республикаын лӧсьӧдӧны сідз шусяна безбарьернӧй среда да збыльмӧдӧны такӧд йитчӧм оланпасъяс.
Сылӧн висьталӧм серти, стрӧитчигӧн талун тшӧкыда «вунӧдӧны» коляскаӧн ветлысь войтыр йылысь, и найӧ выль стрӧйбаас оз вермыны кайны содйӧд, оз тӧрны ӧдзӧсас да с.в. Та вӧсна бӧрас ковмӧ содтӧд лӧсьӧдавны пандусъяс, вежлавны мукӧдтор. А тайӧ, гӧгӧрвоана, – содтӧд рӧскод. Общественница сідзжӧ казьтыштӧма, мый стрӧитчигӧн да дзоньтасигӧн Россияса оланпасъяс серти быть колӧ сёрнитчыны муниципалитетас вермытӧмъяслӧн котыркӧд. Но и таысь пӧ тшӧкыда ӧвтыштчӧны.
–Кор ми корам, мый колӧ содтӧд вӧчны коляскаӧн ветлысьяслы, синтӧмъяслы да сьӧкыд пеляяслы, тшӧкыда кылам воча: тайӧ пӧ зэв дона, миян та вылӧ сьӧмыс абу, ӧні вӧчны ог вермӧй да с.в., – висьталіс Маргарита Колпащикова. – Та вӧсна ме эськӧ вӧзйи, Владимир Викторович, медым республикаын безбарьернӧй среда вӧсна медводз кывкутіс регионса минстрой. Ме гӧгӧрвоа, мый эм нин «Доступная среда» уджтас, кодӧс збыльмӧдӧ удж, занятосьт да йӧзӧс социальнӧй доръян министерство. Но кор сёрниыс мунӧ выль стрӧйбаяс лэптӧм да важсӧ дзоньталӧм йылысь, тайӧс лючки вермас вӧчны сӧмын минстрой. И ми дасьӧсь сылы отсасьны.
Владимир Уйба ошкӧма общественницалысь вӧзйӧмсӧ да индӧма стрӧитчӧм да жилищно-коммунальнӧй овмӧс кузя министерствоӧс регионын безбарьернӧй среда лӧсьӧдӧм вӧсна кывкутысьӧн.
Маргарита Колпащикова корӧма сідзжӧ лӧсьӧдны Сыктывкарын инвалидъясӧс быд боксянь реабилитируйтан республикаса шӧрин. Владимир Уйба тшӧктӧма регионса минтрудсоцлы видзӧдлыны, кыдзи да мый вӧчӧмаӧсь та кузя орчча регионъясын, да дасьтыны миянлы лӧсялана уджтас.
Таысь кындзи локтан воын шуӧмаӧсь «ловзьӧдны» Коми Республикаса юралысь бердын инвалидъяслӧн тӧжд-мог кузя сӧветлысь уджсӧ, коді падмылӧма коронавирус вӧсна.