Декабрь медводдза лунӧ ГТО тест нуӧдан шӧринысь судья котыр волӧма Кулӧмдін районысь Тымсер посёлокса школаӧ. «Готов к труду и обороне!» ставроссияса физкультура да спорт комплекслысь нормативъяс сдайтӧма 1-11 классъясысь 80 ныв-зон.
Томуловлы колӧ вӧлі котӧртны 30 метр челнок моз (куимысь вит метр водзӧ да вит метр бӧрӧ), теннисӧн ворсан мачӧн веськавны пасӧ, кык кокӧн йӧткыштчӧмӧн чеччыштны места вывсянь, мыш вылын куйлӧмӧн ӧти минутӧн кыдз позьӧ унджыкысь кымӧснад судзӧдны пидзӧстӧ, джоджын вӧчны сідз шусяна отжимание, гимнастика лабич вывсянь коктӧ кусыньттӧг кыдз позьӧ улӧджык копыртчывны.
–Найӧ, кодъяс кольӧм во босьтісны ГТО-ысь бронза морӧспасъяс, таво зільӧны бурджыка петкӧдчыны да шедӧдны зарни, – пасйис тест нуӧдан шӧринӧн веськӧдлысь Александра Ногиева. – Кӧсъя аттьӧавны школаса администрацияын зільысьясӧс да торйӧн нин физкультура нуӧдысь Павел Созоновӧс челядьӧс дзоньвидза оласногӧ ышӧдӧмысь да ГТО вужйӧдӧмысь. Тані верстьӧ и челядь кывкутӧмӧн дасьтысьӧны нормативъяс сдайтігкежлӧ.
Таӧдз судья котыр волӧма Кулӧмдінын сизимӧд номера «Голубок» детсадйӧ. Шӧринса сотрудникъяс сэні тшӧтш сёрнитӧмаӧсь дзоньвидза оласног да ГТО йылысь. Дзолюкъяс пиысь кодсюрӧ весиг видлӧма сдайтны медулыс тшупӧда норматив. Найӧ пӧ зэв сьӧлӧмсяньыс вӧчалісны упражнениеяссӧ, кӧть медводдзаысьтӧ эз ставыс артмы. Но та вылӧ видзӧдтӧг подготовительнӧй группаысь кызь нывка да зонка бура петкӧдлӧмаӧсь ассьыныс вын-эбӧссӧ.
–Миянлы зэв нимкодь, мый сиктса челядь радейтӧны спорт да дасьӧсь шедӧдны ГТО морӧспас. Матысса кадӧ волам Кулӧмдінса мукӧд детсадйӧ, – кӧсйысьӧма Александра Ногиева.