Неважӧн Кӧрткерӧс районса Висер сиктын олысьяслы воӧма биысь вештысян тшӧт — арталӧмаӧсь быдӧнлы 3-5 сюрс шайтӧн. Йӧзыс шыӧдчӧмаӧсь ставроссияса «Народнӧй фронтӧ» отсӧгла.
Кыдзи юӧртӧны «фронтӧвикъяс», на дорӧ отсӧгла шыӧдчысьяс олӧны Совхознӧй уличаса коймӧд номера 12 патераа пу керкаын. Стрӧйбаыс зэв нин важ, подъездас ӧзйӧ ӧти лампочка. Биысь ӧтувъя счётчикыс абу да, керкаас олысь-ясысь быдӧн бисӧ вештӧ аслас счётчик серти. Подъездса лампочкасӧ пӧ налӧн гортса счётчикас жӧ йитӧмаӧсь.
ОНФ-ысь экспертъяс пыр жӧ шыӧдчӧмаӧсь Сыктывкарын да Кӧрткерӧс районын государственнӧй жилищнӧй инспекцияӧ да энергетикъяс дорӧ, мед видзӧдласны да вочавидзасны, кытысь татшӧм тшӧтыс? Би сетысьяс винитчӧмаӧсь, сорсим пӧ, да биысь ыджыд тшӧтсӧ киритӧмаӧсь.
Висерса аттьӧалӧны «фронтӧвикъясӧс» отсӧгысь.
Но общественникъяс, налӧн кывъяс серти, Совхознӧй уличаса коймӧд номера керкаын олысьяслы водзӧ на кӧсйӧны отсасьны. Стрӧйбаыс ӧд дзик нин шогмытӧм. Керкаас шоныдыс оз во да, олысьясыс пач ломтӧны. Юан ваыс абу жӧ, колӧ ваявны юкмӧсысь ведраӧн. Канализация пыдди — гу. Но медся нин майшӧдлӧ, мый керкаыс дзикӧдз нёрӧма, вевтыс кӧнсюрӧ киссьӧма. Мӧдӧд судтаас олысьяслӧн патерааныс кодсюрӧлӧн пӧтӧлӧкыс нин лайкмунӧма, он и тӧдлы, поньталас. Зэригӧн медводдза судтаӧдзыс ставыс виялӧ, стеныс да подулыс сісь жӧ.
Йӧзыс 2019 восянь районса чинаясӧс корӧны шуны стрӧйбасӧ шогмытӧмӧн, но райадминистрация, тыдалӧ, балябӧжсӧ на гыжъялӧ.
—Керкаыс киссьыны заводитӧма 1991 восянь. Сэки сиктса совхозыс лоӧма банкрот да, олан керкаас шоныд сетӧмыс лоӧма некодлы ковтӧм. И шоныд сетан батареясӧ вундалӧмаӧсь. Сэки нин колӧ вӧлӧм шуны стрӧйбасӧ шогмытӧмӧн, но сиктсаяс ӧнӧдз олӧны, воштысьнысӧ некытчӧ да, — висьталӧ ОНФ-лӧн штабӧ пырысь Елена Иванова. — Ми шыӧдчим райадминистрацияӧ, мед тэрмасьыштасны, котыртасны колана комиссия да керкасӧ шуасны овны шогмытӧмӧн, а йӧзсӧ ву-джӧдасны мӧдлаӧ «Переселение» уджтас серти.