Сыктывкарын доброволечьяслысь ресурс шӧрин вӧлі лӧсьӧдӧма 2017 воын. Шӧр могыс сылӧн – отсавны водзмӧстчысь йӧзлы дасьтыны да збыльмӧдны социальнӧй проектъяс. Но тавоӧдз абу вӧлӧма сідз шусяна площадкаыс, кӧні эськӧ вермисны аддзысьлыны волонтёръяс да налӧн котыръяс. 2020 вося августын татшӧм площадкасӧ сетӧмаӧсь юркарын республикаса госслужба да веськӧдлан академияын.
Ӧні волонтёръяслы позьӧ тані чукӧртчывны, ӧтвылысь мӧвпалыштны выль проектъяс йылысь либӧ паныдасьлыны уджъёртъясыскӧд.
Шӧринын зільысьяс сетӧны методика отсӧг да индӧдъяс и специалистъяслы, кодъяс уджалӧны доброволечьяскӧд. Шӧринас кык переговорнӧй жыр, актӧвӧй зал, эм кӧні шойччыштны. Тырмӧ и колана оборудованиеыс, мед нуӧдны быдсикас чукӧртчылӧм-аддзысьлӧм. Тані жӧ волонтёръяс паныдасьлӧны общественнӧй котыръясын водзмӧстчысьяскӧд да власьт тэчасысь чина йӧзкӧд.
Ксения Рубцова, шӧринса специалист, пасйӧ, мый зэв тӧдчана вӧлӧма томуловлӧн «Молодёжь Коми – 2020» форум, кодӧс нуӧдӧмаӧсь тані тӧлысь чӧж. Сэки шӧринас волӧма 75 гӧгӧр морт. Уджыс мунӧма некымын нырвизьӧд: кыдзи патриотъясӧс быдтыны-сӧвмӧдны, проектъяс дасьтыны-лӧсьӧдны, велӧдчанінъясын волонтёравны.
Декабрь 5 лунӧ доброволечьяс пасйӧны ассьыныс «профессиональнӧй» гаж – Волонтёръяслысь лун. Шӧринын зільысьяс дасьтысьӧны жӧ чолӧмавны-нимӧдны йӧзкӧд уджын водзмӧстчысьясӧс.
Ирина ТЕРЕНТЬЕВА.