Бӧръя воясӧ Комиын, кыдз и страна пасьталаын, пыр унджыкӧн и унджыкӧн босьтчӧны волонтёравны: ӧтка йӧзлы отсасьны, пемӧс дӧзьӧритны, вӧр-ва видзны, культура гажъясын водзмӧстчыны да с.в.
Сыктывкарын волонтёръяслӧн котырӧн веськӧдлӧ зіль ныв Мария Носова, кодкӧд неважӧн сёрнитім «Мы вместе» акция йылысь.
Тайӧ ставроссияса акцияыс заводитчис таво март тӧлысь помын. Нуӧдны шуӧмаӧсь медик-волонтёръяскӧд ӧтвылысь.
Медшӧр могыс – отсавны ыджыд арлыдаяслы, кодъяс коронавирус понда веськалісны сідз шусяна самоизоляцияӧ, да налы оз вӧлі позь петавлыны гортсьыс. И буретш волонтёръяс могмӧдісны найӧс сёян-юанӧн да лекарствоӧн, петкӧдісны налысь ёг-шыблассӧ да с.в. Ветлывлісны весиг юркарбердса Заречьеӧ, кытчӧ абу кокни воӧдчыны.
Мария пасйис, мый акциясӧ бура нимӧдӧмаӧсь, мед унджыкӧн тӧдмалісны сы йылысь: ӧшлӧмаӧсь баннеръяс, петкӧдлӧмаӧсь телевизор пыр, гижӧмаӧсь газетъясын.
И зэв унаӧн шыӧдчӧмаӧсь, мед отсавны йӧзлы. Но босьтӧмаӧсь сӧмын 18 арӧсысь ыджыдджыкъясӧс.
–Талун акцияыс мунӧ на, – висьталіс Мария Носова, – сы вӧсна мый 65 арӧсысь олӧмаджыкъяс бара на самоизоляцияынӧсь. Кӧть орччаӧдны кӧ апрель-май тӧлысьяскӧд, кор ставӧн пукалім гортын, ӧні татшӧмыс чиныштіс. Шуам, вузасянінъясын урчитісны торъя часъяс, кор кызвыннас ньӧбасьӧны пӧрысьджыкъяс. Сэсся уналы челядь-внукъясыс отсасьӧны…
Ачыс Мария Сыктывкарын нуӧдӧ сідз шусяна инструктажъяс, социальнӧй службаын зільысьяскӧд тшӧтш телефон пыр йитчылӧ пӧль-пӧчкӧд, сёрнитчӧ, кор позьӧ на дорӧ волонтёръяслы волыны, кутшӧм сёян-юан вайны.
Овлӧ, ыджыд арлыда йӧзлы колӧ и психология боксянь отсӧг сетны, сёрнитыштны накӧд да бур кывйӧн ышӧдны.
–Став сьӧлӧмсянь аттьӧала миянлысь волонтёръясӧс, – пӧся висьталіс Мария. – Ставныс зэв шаньӧсь, абу веськодь налы мукӧдлӧн шог-дойыс. Быдӧнлӧн – аслас семья, удж, олӧм, но век аддзӧны кад отсавны налы, кодъяслы талун сьӧкыд. Гораа лоӧ шуӧма, но збыльысь ӧд, волонтёрыд – морт, кодлӧн сьӧлӧмыс ломалӧ югыд биӧн, да тайӧ бинас сійӧ шонтӧ мукӧдӧс.
Ирина ТЕРЕНТЬЕВА.