«Коми йӧзӧдчан керкалӧн» «Лок татчӧ» проектлы панассӧ пуктӧма воысь унджык сайын. И, дерт жӧ, зэв уналаын нин нималӧны миян коми гижӧда футболка, кружка да ежедневник. И оз сӧмын республикаса сикт-карын, но и Россия пасьталаын да весиг суйӧр сайын.
«Лок татчӧ» проектсӧ дасьтысьяс чайтісны, мый сійӧ лӧсялас сӧмын томуловлы. Но, кыдз тыдовтчис, коми гижӧда паськӧмсӧ радпырысь новлӧны и челядь, и верстьӧ. Кодкӧ ньӧбӧ аслыс, кодкӧ козьналӧ матыссаыслы.
География боксянь медылӧдз, буракӧ, нимӧдіс проектсӧ Кӧрткерӧс районысь Елена Габова. Тулыснас «Лок татчӧ» футболкаӧн сійӧ тшапитчис Шри-Ланкаын, а гожӧмнас – Камчаткаын.
–Дыр мӧвпалі, кутшӧм гижӧд бӧрйыны аслам футболка вылӧ. Кӧсйи, рочасьыштны кӧ, мый-кӧ уникальнӧйӧс, – висьталіс Елена. – Степан вокӧлы коркӧ шуи, мый Шри-Ланкаӧ мӧдӧдча сёрфингасьны. Воклӧн серамыс петіс да вочавидзис: лешакыс пӧ тай тэнӧ новлӧдлӧ. Тадзи шмонь-сора гижӧдыс и чужис. Сэсся йитчи проектсӧ збыльмӧдысьяскӧд, висьталі, мый кӧсъя «лешак» пасйӧда футболка, и регыд нин сійӧ вӧлі дась.
Тӧдчӧдам, быдсикас гижӧдсӧ позьӧ бӧрйыны аслад дум-кӧсйӧм серти, а позьӧ и дась коми пасйӧдасӧ нин «Ордым» лавкаысь ньӧбны.
«Лок татчӧ» коллекцияыс зэв уналы воӧ сьӧ-лӧм вылас, кыдзи праздник кежлӧ аслыспӧлӧс козин. «Ордымын» вузавлӧны нин «Выль во» гижӧда открыткаяс, сынанъяс да ручкаяс, шмоньсора да тешкодь пасйӧда футболкаяс, блокнотъяс да значокъяс.
Проектсӧ збыльмӧдысьяскӧд позьӧ йитчывны ӧтуввезйын «Вконтактеын» https:ӦӦvk.comӦlok_tatcho группа пыр, волыны либӧ звӧнитны «Ордым» лавкаӧ (Карл Маркс улича, 229, телефоныс: 89121765355).
Шензьӧдӧй да нимкодьӧдӧй матыссаястӧ мича козинӧн!