Веськыд эфирын – Анастасия Тюрнина

Анастасия Тюрнина бура тӧдса «Юрган» телеканал видзӧдысьяслы – 17 во чӧж тайӧ мичаник да авъя коми аньыс зільӧ журналистӧн да «Талун» уджтас нуӧдысьӧн.

Чужӧма-быдмӧма Анастасия Кулӧмдін районса Помӧсдін сиктын. Сыктывкарса госуниверситет помалӧм бӧрын дзик пыр и корӧмаӧсь уджавны «Юрганӧ», ӧд студенталігас на ныв видлӧма ассьыс вын-сямсӧ «Коми горын», со и казялӧмаӧсь Анастасиялысь енбисӧ.

Прӧст кадӧ сійӧ ветлывлӧ театрӧ, оз дышӧдчы и спортзалӧ пыравны. Тулыс-ар ноксьӧ асланыс дачаын: вӧдитӧ град выв пуктас да уна дзоридз. Радейтана верӧсыскӧд быдтӧны 13 да 8 арӧса пиянӧс, кыкнанныс пӧ – хоккеистъяс.

Аслас уджын Анастасиялы медъёна кажитчӧ нуӧдны веськыд эфир.

–Кӧть эськӧ абу нин ӧти во кадрын, но «Талун» уджтассӧ заводитігӧн быд пӧрйӧ сьӧлӧмӧй вӧрзьылӧ, – висьталӧ Анастасия. – Зіля юӧртны выльторъяссӧ сӧстӧм коми кывйӧн. Да и экран вылад пыр колӧ лоны кыпыд руаӧн да мичаӧн, кӧть кыті тэнад оз вись да кӧть мый оз майшӧдлы. Кажитчӧ, дерт, и репортаж дасьтыны, уна сикас тема туявны.

Галина МАКАРОВА.

Снимокыс Павел ФЕТИСОВЛӦН.

Веськыд эфирын – Анастасия Тюрнина

«Коми му» газетысь, кодӧс позьӧ судзӧдны пошта пыр, позьӧ ньӧбны «Ордым» лавкаын. Медым лыддьыны электроннӧй версия, личкӧй татчӧ. Эмӧсь кӧ юалӧмъяс, гижӧй komi-kerka@ya.ru.

Пролистать наверх