Тайӧ вежонӧ «Мы – россияне» этнофорум чукӧртліс том журналистъясӧс да ӧтуввезйын блог нуӧдысьясӧс.
Выльлунӧ найӧ ветлісны Сыктывдін районса Ыбӧ. Россияса уна сикас войтыр костын лада олӧм лӧсьӧдӧм йылысь сёрни пансьыліс этнопаркын. Гижны босьтчысьяскӧд асланыс опытӧн юксисны финн-йӧгра культура шӧринӧн веськӧдлысь Татьяна Барахова, «Регион» петасса главнӧй редакторӧс вежысь, Комиын меж-этническӧй журналистикалысь школа нуӧдӧм вӧсна кывкутысь Полина Романова, Россияса войтырлӧн ассамблеяса пресс-службаӧн юрнуӧдысь Анжелика Засядько (Лукина). Висьтасисны и асьныс том войтыр. Кулӧмдін районса Донысь Артур Гарнов сёрнитіс сиктса культура йылысь, кутшӧм сійӧ збыльвывса олӧмас да кыдзи петкӧдчӧ ӧтуввезйын. «МИ» котырӧн веськӧдлысь Анна Махотина тӧдмӧдіс Instagram-ын нуӧдан аслас блогӧн, а юркарса культура колледжын велӧдчысь Генрих Немчинов – YouTube-ын збыльмӧдан уджтасъяснас. Сійӧ петкӧдліс тшӧтш и ассьыс выль удж. Тайӧ вежонӧ пӧ страна пасьтала гижам этнографияысь диктант да, сы йылысь и дасьті видеосӧ.
–Роликъяссӧ ме зіля вӧчны сідзи, медым видзӧдысьыслы эз вӧв гажтӧм. Та вӧсна видеояслӧн панасыс абу кузь, и висьтасьӧмӧс торйӧдла шыладӧн, – пасйис Генрих. – Казялі нин: мортыслы тырмымӧн ӧти секунд, медым тыр-бура гӧгӧрвоны, мый петкӧдлӧма видеоас. Миян ӧні быдсикас юӧрыс юр выв тыр, ми пондім пӧдны нин сы пытшкӧ, и мӧвпала выль роликъяссӧ йӧзӧдны тӧлысьнас ӧтчыд. Но вӧчны найӧс бура.
Том йӧзӧс ӧд некод мырдӧн оз тшӧкты роликъяссӧ снимайтны, блогсӧ нуӧдны. Ас кӧсйӧм сертиыс тайӧс вӧчӧны. Генрихлӧн кывъяс серти, меным пӧ окота коми культура туявны, да сійӧн и лӧсьӧді блогӧс. Том журналистъяслӧн форум йылысь сійӧ вӧчӧма жӧ ролик. Видзӧдан сійӧс да пыр жӧ и казялан, мый Генрих бура тӧдӧ, кодъяслы, кутшӧм видзӧдысьлы вӧчӧма роликсӧ: ас кодьыс жӧ томъяслы, войтыръяслысь олӧмсӧ, культурасӧ туявны кӧсйысьяслы.
Юалісны Генрихлысь, тэ пӧ сиктса морт да, кыдзи видзӧдӧны тэнад зільӧм вылӧ ас сиктсаыд? Нюмсорӧн вочавидзис, медводз пӧ пышъялісны меысь, а ӧні асьныс нин кӧсйӧны, мед снимайті найӧс. Сідзкӧ, позьӧ шуны, донъялӧмаӧсь, и донъялӧмаӧсь бур боксянь.
Ыбса этнопаркӧн кындзи том гижысьяс да блогеръяс и сиктнас тӧдмасисны, пыралісны сись вӧчан «Белый свет» заводӧ.
А Сыктывкарӧ воисны да, сёр рытнас нин, и войсӧ пайкыштӧмӧн тшӧтш, дасьтісны ветлӧм йывсьыс гижӧдъяс, презентацияяс, видеороликъяс. Межэтническӧй журналистика школаын на велӧдчӧны, а опыта репортёр-корреспондентъяс моз нин уджалӧны: луннас ветлін командировкаӧ, рыт-войнас дасьтін гижӧд-передачатӧ, а асывнас лыддьысьысь-видзӧдысьлы нин донъявны петкӧдлін.
Быдӧн ачыс бӧрйис, мый йылысь кӧсйис висьтавны. Кодкӧ дзоньнас ветлӧм йывсьыс гижис, кодкӧ – сикт йывсьыс, а кодкӧ презентация дасьтіс, мыйӧн туристъясӧс вермас шемӧсмӧдны Ыб.
Медуналысь сьӧлӧмсӧ вӧрзьӧдӧма сись вӧчан заводсӧ лӧсьӧдысь Наталья Паутовакӧд аддзысьлӧм-тӧдмасьӧм – и сы йылысь гижӧмаӧсь, и сись вӧчӧм йывсьыс. Вайӧдісны и сылысь кывъяссӧ: шулам пӧ – ставыс лёк, ставыслы пом, но олӧмад сьӧкыдлуныс пыр паныдасьлӧ, и ми венам найӧс. Сідзкӧ пӧ, ми олам. Тайӧ кывъясыс кӧ йиджисны том йӧзлӧн сьӧлӧмӧ, сідзкӧ, збыльысь олам. И водзӧ овны кутам.
Павел Анохин.
Снимокъясыс Мария ИгушевалӦн.