«Коми войтыр» ӧтмунӧмса исполкомлӧн кольӧм лунъясӧ чукӧртчылӧм дырйи, кытчӧ воліс регионса юралысь Владимир Уйба, сёрниыс вӧлі йӧзлысь дзоньвидзалун видзан юкӧн да туй овмӧс сӧвмӧдӧм йылысь, мый зэв тӧд-чана да колана республикаын олысьяслы.
Владимир Уйба висьталіс, матысса воясӧ медицина юкӧнлысь сідз шусяна инфраструктурасӧ выльмӧдӧм-бурмӧдӧм кузя кутшӧм могъяс пуктӧма республикаса правительство водзӧ.
Казьтыштам, Владимир Путинкӧд Владимир Уйбалӧн онлайн аддзысьлӧм дырйи Россия Федерацияса президент сетіс кык индӧд. Ӧтисӧ збыльмӧдӧм могысь республикаса правительство дасьтіс Комиын йӧзлысь дзоньвидзан юкӧнысь сідз шусяна первичнӧй звеносӧ выльмӧдӧм-бурмӧдӧм кузя регионса проект, код серти лоӧ кыпӧдӧма 63 бурдӧдчан стрӧйба, мый вылӧ артыштӧма куим миллиард сайӧ шайт, а сідзжӧ 253 миллион шайт дон капитальнӧя дзоньталӧма 40 ФАП-больнича.
Стӧча, уна-ӧ сьӧм лоӧ вичмӧдӧма да кор вӧчӧма став тайӧ уджсӧ, шуӧма урчитны РФ-са минздравлысь программасӧ вынсьӧдӧм бӧрын. Ылӧсас на артыштӧм серти, тайӧ уджтассӧ збыльмӧдӧм вылӧ республикаса кудйысь лоӧ вичмӧдӧма коланасьыс 10 прӧчент сьӧмсӧ.
Президентлӧн мӧд индӧд сертиыс Комиын кыпӧдасны 260 койка вылӧ перинатальнӧй шӧрин, кӧні ӧти сменаӧ врачьяс дорӧ вермас шыӧдчывны 120 морт. Выль стрӧйбасӧ лэптыны ковмас 4,7 миллиард шайт.
Сиктын олысьяслы медицина услуга ас кадӧ да бура сетӧм могысь колӧ тӧдчымӧн унджык выль санитарнӧй машина. РФ-са правительстволӧн индӧд серти, таво Комиӧ воас тэрыб отсӧг сетан 28 выль автомашина.
2020-2021 воясӧ сідзжӧ шуӧма кыпӧдны 19 ФАП, сы лыдын витӧс – Изьва да та мында жӧ – Кӧрт-керӧс, нёльӧс – Кулӧмдін, ӧтиӧн – Емдін, Сыктывдін, Сыктыв, Сосногорск да Усинск районъясын. Та вылӧ артыштӧма 300 миллионысь унджык шайт.
Республикаса юралысьлӧн индӧд серти жӧ шуӧма дасьтыны-велӧдны медицинаса унджык специалистӧс. Таво кырымалӧма специалитет программа кузя велӧдчӧм йылысь 95 да ординатураын тӧдӧмлун босьтӧм могысь 41 договор.
Республикаса бюджет весьтӧ «Лечебное дело» специальносьтӧ велӧдчыны босьтӧма 20 студентӧс. Содтӧд ветымын морт велӧдчӧны медсестраӧ да фельдшерӧ.
Таво кольӧм воын дорысь 2,5 пӧв унджык сьӧм (83 миллион шайт) артыштӧма «Земский доктор» да «Земский фельдшер» программаяс збыльмӧдны, а сідзжӧ 48 миллион шайт лоӧ видзӧма Сыктывкарын, Ухтаын да Печораын медикъяслы 19 патера ньӧбӧм вылӧ.
Владимир Уйба висьталіс сідзжӧ туй овмӧсын мытшӧд-падмӧг бырӧдӧм йылысь.
Тайӧ юалӧм кузяыс, сылӧн кывъяс серти, зэв унаӧн шыӧдчылӧны сы дорӧ муниципалитетъясын йӧзкӧд аддзысьлӧмъяс дырйи, а сідзжӧ ёсь сёрни кыптывлӧ коми войтырлӧн быдвося конференцияяс вылын.
Такӧд йитӧдын таво Комиын збыльмӧдсьӧ инвестицияа адреснӧй программа, код серти помалӧма нин машинаӧн ветлан Сыктывкар – Мылдін туйлысь Носим сиктӧ вайӧдан юкӧнсӧ.
Ыджыд тӧдчанлун сетсьӧ посъяс дзоньталан уджлы. Во помӧдзыс шуӧма дзоньтавны квайт пос, сы лыдын нёльсӧ эштӧдӧма нин, нӧшта кыкыс – помалан выйынӧсь.
Выльмӧдӧма Сыктывкар – Нарьян-Мар автотрассалысь Кабанты Виссянь Ичӧт Пераӧдз матӧ 23 километр кузьта юкӧн.
Инвестицияа программасьыс ӧтдор республикаын збыльмӧдсьӧ сідзжӧ «Безопасные и качественные дороги» нацпроект, код серти дзоньталӧма нин 70-ысь унджык километр.
Таво медводдзаысь муниципалитетъяслы улича-туй дзоньтавны-выльмӧдны вичмӧдӧма ӧти миллиардысь унджык шайт.
–Артыштны кӧ ставсӧ, таво регионын туй овмӧс сӧвмӧдӧм вылӧ торйӧдӧма 7 миллиардысь унджык шайт, и тайӧ сетіс позянлун тӧдчымӧн ыджыдджык отсӧг вичмӧдны кар-районъяслы. Ми и водзӧ кутам корсьны позянлун бурмӧдны тайӧ уджсӧ, – кывкӧрталіс республикаса юралысь.