Ноябрь 5 лунӧ Госсӧветын медводдза сессиялӧн коймӧд чукӧртчылӧм дырйи парламентарийяс вынсьӧдісны юралысьӧн правительствоӧ вӧзйӧмаясӧс.
Медводз Владимир Уйба юӧртіс, правительствоӧн веськӧдлыны пӧ мӧда ачым.
–Локтан да 2022-2023 воясса бюджет дасьтігӧн гӧгӧрвои, мый сьӧмӧн лоас зэв дзескыд. Коронавирус пандемия вӧсна экономикаын зэв уна мытшӧдыс. Та вӧсна кодлӧнкӧ мыш сайын дзебсясьны ог кӧсйы. Ачым мӧда кывкутны правительстволӧн удж вӧсна, – юӧртіс Комиӧн веськӧдлысь.
26 депутатысь кызьӧн ошкисны правительствоӧн юрнуӧдысьӧс первой вежысьӧн Игорь Булатовӧс. Нёльӧн вӧліны талы паныд, кыкӧн – сідз ни тадз эз гӧлӧсуйтны.
Владимир Уйба юӧртіс вице-премьеръяс йылысь, кодъясӧс индӧм могысь оз ков парламентлӧн ошкӧм. Тайӧ Галина Габушева, коді мӧдас кывкутны культура, спорт, национальнӧй политика да общественнӧй котыръяс вӧсна, а сідзжӧ веськӧдлыны национальнӧй политика министерствоӧн. Дмитрий Самоваров босьтчас водзӧ сӧвмӧдны пытшкӧс политика, Ирина Бахтина – предпринимательство да инвестицияяс, Лариса Карачёва – социальнӧй юкӧн. Сьӧмкудйӧн вӧдитчӧмысь мӧдас кывкутны Галина Рубцова финансъяс кузя министр.
Кызвын депутатыс ошкисны уджсӧ Сергей Мамоновлысь да Валерий Козловлысь, кодъяс Коми Республиканымӧс дорйӧны-нимӧдӧны Москваын да Санкт-Петербургын. 23 гӧлӧс ӧкмис Игорь Гурьевлӧн, кодӧс Владимир Уйба вӧзйис веськӧдлыны видзӧдан-артасян палатӧн.
Стӧча нин позьӧ шуны, мый Игорь Кузьмичёв мӧдас веськӧдлыны стрӧитчан да жилищно-коммунальнӧй овмӧс, Виталий Савилов – физкультура да спорт, Сергей Емельянов – культура, туризм да архив делӧяс министерствоясӧн, Александр Бурцев – йӧзӧс доръян да виччысьтӧм лоӧмторъяс кузя комитетӧн.
Республикаса юралысьлӧн администрацияӧн мӧдас веськӧдлыны Игорь Божков.
Заседание бӧрас нин Владимир Уйба гӧгӧрвоӧдіс, кутшӧм ногӧн бӧрйис правительствоӧ йӧзсӧ:
–Медводз колӧ, медым мортыс эз ылӧдчы, да сылӧн олӧмын эз вӧв некутшӧм сьӧд чут. Тӧд вылын куті, кыдзи сійӧ зілис воддза удж вылас. Тӧдчана, медым сійӧс тӧдісны федеральнӧй тшупӧдын, Россияса правительствоын да министерство-ведомствоясын. И, дерт, медым сійӧ пыдди пуктіс Комиын олысьяслысь традицияяссӧ да национальнӧй аслыс-пӧлӧслунсӧ.