2020 воӧ «Монди Сыктывкарса ЛПК» компанияысь экологъяс лэдзисны Эжва да Мозын юясӧ 600 сюрс кебӧспи. Бӧръя сизим вонас жӧ Мылдін, Кулӧмдін, Удора да Емдін районъясын Печораӧ, Эжваӧ да Мозынӧ вӧлі лэдзӧма дона черилысь 2,4 миллионысь унджык арпи. Тадзи «Монди СЛПК» збыльмӧдӧ экологияын политика да тӧждысьӧ вӧр-ва да сэні олысьяс вӧсна.
Республикаса ты-юын дона чериыс воысь-во чинӧ, та вӧсна «Монди Сыктывкарса ЛПК»-лӧн войвывса вӧр-валысь озырлунсӧ видзан уджыс зэв тӧдчана. Чери рӧдмӧдігӧн компания оз торкав Росрыболовстволӧн наука туялан организацияяслысь тшӧктӧмъяссӧ.
–Юясӧ чери лэдзӧмнас компания пуктӧ регионса вӧр-ва озырлун видзӧмӧ ассьыс пай. Компанияӧс мытшӧдъястӧг сӧвмӧдан уджын тайӧ сӧмын ӧти нырвизь, – пасйис «Монди Сыктывкарса ЛПК»-ысь генеральнӧй директор Клаус Пеллер.
Компанияса главнӧй эколог Дмитрий Очеретенколӧн кывъяс серти, предприятие зільӧ бур ногӧн вӧдитчыны вӧр-ва озырлуннас.
–Ми ог пӧрӧдӧй вӧрсӧ, таысь кӧ вӧр-ваыслы лоӧ лёк, асьным быдтам да садитам пуяс, рӧдмӧдам чери, – шуис сійӧ.
Кебӧспиянсӧ быдтісны Косланын «Главрыбвод» учреждениеса Коми юкӧнлӧн производство вылын. Арпияныс крепыдӧсь, юӧ лэдзӧм бӧрын найӧ ӧдйӧ велалӧны овны сэні.
–Ми босьтам-чукӧртам кебӧс да ком пӧксӧ сӧмын республикаса юясын олысь черилысь, татшӧм ногӧн видзам налысь генетикасӧ,– висьталіс «Главрыбводлӧн» Коми юкӧнӧн веськӧдлысь Владимир Мальцев.
Юясӧ лэдзӧм арпиянсьыс нёль во мысти быдмас 2,5 сюрс чери, да сійӧ ачыс нин кутас водзӧ рӧдмыны.