“Йӧлӧга” журнал лыддьысьяслы бура тӧдса Сыктывкарса 77-ӧд номера челядь садйын зільысь педагог Вероника Николаевна Нестерова бара на вӧзйӧ ки-чуньяс песыштны. Та пӧрйӧ велӧдӧ вӧчны “Вӧрын быдмӧ тшак” композиция.
Колӧ: пластилин, гуашь, мый вылын кутам тэчны композиция – шуам, тасьті, туалетнӧй кабалалӧн топыд картонысь туба-шӧрыс, апельсин-мандарин-лимонлысь водзвыв косьтӧм кыш, ножич, кисточка, ПВА клей, коръяс вылӧ уна рӧма дӧра, фетр, нетканка, гӧн (шерсть) да композиция мичмӧданторъяс (кор, тусь, нитш).
Медводз туалетнӧй кабала улысь тубаысь вӧчам тшаклысь коксӧ. Тубаыс колӧ тшак лыд сертиыс. Позьӧ и ыджданас “ворсыштны”, шуам, вундыны коксӧ дженьыдджыка.
Та бӧрын еджыдӧн краситам “тшак кок”.
Косьмыштас да, сы вывті визьясӧн мавтам сьӧд гуашӧн.
Миян артмис куим тшак кок. Ӧні найӧс пластилин отсӧгӧн сувтӧдам тасьті вылӧ. Позьӧ и неуна боквыв пӧрӧдыштны “тшак коксӧ”.
Та бӧрын апельсин-мандарин-лимонлысь косьтӧм коркаяс пысалам клей да пластилин отсӧгӧн “тшак кокъясӧ”.
Та бӧрын тасьті вылӧ тэчам гӧн, кыті колӧ, клеитышталам, медым кутчысис. Сэсся мичмӧдам нитшкӧн, тусь-корйӧн.
Абу кӧ корйыс – вӧчны найӧс позьӧ уна рӧма дӧраысь.
Со и дась ас киӧн вӧчӧмтор. Татшӧм мича тшакъяса композициятӧ абу яндзим петкӧдлыны либӧ козьнавны кодлыкӧ.
Молодечьяс!
