Александр Александрович Католиковлӧн чужан лунӧ, октябрь 13 лунӧ, Москваса педагогика университетысь физика да информацияа технологияяс институтын восьтісны СССР-са народнӧй велӧдысьӧс, Коми Республикаса почёта гражданинӧс казьтылан пӧв. 1960-ӧд вояс заводитчигӧн Александр Католиков велӧдчыліс буретш тайӧ университетас, а Сыктывкарын уна во юрнуӧдіс агрошкола-интернатӧн.
Вузын казьтылан пӧвсӧ ӧшӧдісны Москваын «Коми землячество» да университетса веськӧдлысьяслӧн водзмӧстчӧмӧн. Землячествосянь та вӧсна кывкутысьнас вӧлі Дмитрий Кропотин. Чукӧртчӧм войтырӧс чолӧмалісны котырса правлениеӧн юрнуӧдысьӧс вежысь Виктор Экгардт да республикаса Госсӧветысь депутат Дмитрий Шатохин.
Москваса педуниверситетысь музейӧн веськӧдлысь, история наукаса доктор Сергей Половецкий пасйис, мый вузын гӧрдитчӧны асланыс вӧвлӧм студентӧн да оз вунӧдны Александр Александрович Католиковӧс. Музеяс регыд позяс аддзыны и вуз помалӧм йылысь сылысь дипломсӧ.
Казьтылан пӧвсӧ восьтыны Сыктывкарысь воліс А.А.Католиковлӧн пиыс – Виктор Александрович.
–Миян семьялы тайӧ зэв тӧдчана лоӧмтор, – висьталіс сійӧ. – Жаль, мамӧй нёрпалӧ да, эз вермы волыны татчӧ. Тшӧтш и сы нимсянь кӧсъя аттьӧавны ставнытӧ, мый видзанныд бать йылысь паметьсӧ. Казьтылан пӧвйыс стӧча петкӧдлӧ батьлысь шуӧмсӧ: «Став челядьыс – миян, и ми кывкутам на вӧсна».
МПГУ-са физика велӧдан теория да методика кафедраысь научнӧй веськӧдлысь Наталия Пурышева велӧдчылӧма Александр Католиковкӧд.
–Сылӧн локтӧмӧн факультетын олӧмыс вежсис, – висьталіс сійӧ. – Студентъяс пӧвстын Александр Александрович вӧлі водзмӧстчысьӧн, и сійӧс ставӧн радейтісны да пыдди пуктісны.
А.А.Католиков нима школа-интернатса директор вежысь Марина Коснырева быдмылӧма-велӧдчӧма интернатас.
–Александр Александрович ставнымӧс радейтліс да быдторйӧн отсавліс миянлы, – казьтыштіс сійӧ. – Ӧні и ачым нин вӧча став позянасӧ, медым миян челядь эз кывны асьнысӧ ӧткаӧн, эновтӧмӧн.
Чукӧртчӧмаяс видзӧдісны режиссёр Никита Белорусовлысь «Католиков. Начало» документальнӧй фильмысь юкӧнъяс. Сэні висьтавсьӧ нималана педагоглӧн Москваын велӧдчӧм йывсьыс. А Ирина Косолапова аддзысьлӧм дырйиыс сьыліс комиӧн.
Пасъя нӧшта, мый во мысти Александр Александрович Католиковлӧн чужӧмсянь тырас 80 во.
Анна Ткаченко.