Кольӧм вежонӧ Владимир Уйба воліс омӧля аддзысьяслӧн котырысь Коми регионса юкӧнӧ. 2020 вося сентябрсянь сійӧ меститчӧ Виктор Савин уличаса кык судтаа кирпич керкаын.
Республикаса юралысьлы висьталісны общественнӧй котырлӧн удж йылысь, петкӧдлісны жыръяс, кӧні омӧля аддзысьясӧс велӧдӧны профессияӧ, тӧдмӧдісны накӧд уджалысь специалистъяскӧд.
–Мир пасьтала ветымын во нин пасйӧны Еджыд бедь лун. И ми аддзысим тіянкӧд буретш тайӧ лунас, – висьталіс Владимир Уйба. – Тіян котырныд зільӧ венны синтӧмъяслысь да омӧля аддзысьяслысь мытшӧдъяссӧ, отсалӧ налы велӧдчыны, удж вылӧ инасьны. Тайӧ зэв колана, ӧд некодӧс оз позь кольны ӧтнассӧ тӧждъяс кежсьыс. Мед быдӧн тӧдіс, мый колӧ рӧдвужыслы, йӧзкотырлы. Аттьӧ тіянлы татшӧм колана уджсьыс. И ме, и республикаса правительство дасьӧсь отсавны тіянлы тайӧ уджас.
Омӧля аддзысьяслӧн котырысь Коми регионса юкӧн вӧлі котыртӧма 1928 вося декабрын. Ӧні сэтчӧ ӧтувтчӧма 670 морт. 2002 восянь котырнас веськӧдлӧ Александр Верховод. Организациялӧн юкӧнъяс эмӧсь Сыктывкарын, Воркутаын, Ухтаын, Печораын, Емдін, Кулӧмдін, Сыктыв районъясын.