Коми Республикаса вужвойтырлӧн шылада-драмаа театрын вӧлі Оля Санлӧн «Шудлы шуДа» концерт. Радейтана сьылысь петкӧдчис кык рыт нималана артист Андрей Епанешниковкӧд.
Артистъяс абу весьшӧрӧ нимтӧмаӧсь тадзи шылада рытсӧ. Андрей Епанешников видліс тӧдмавны видзӧдысьяслысь, кыдзи найӧ гӧгӧрвоӧны шудсӧ, корис вочавидзны, кор мортыс кылӧ асьсӧ шудаӧн да мый сылы колӧ та могысь.
Радейтана артисткӧд ёрта сёрниӧ пырӧдчисны окотапырысь. Быдӧн кӧсйис висьтыштны сылы ас йыв-сьыс. Ӧтвылысь казьтылісны и медводдза радейтчӧм йылысь.
Дерт, рытыс вӧлі и шылада. Оля Сан сьыліс радейтчӧм йылысь. Юргисны тӧдса сьыланкывъяс, кыдзи «Атаман», «Тӧв»… Вӧлі и роч вылысь комиӧдӧм, шуам, Эдита Пьехалӧн «Сосед», а сідзжӧ «Интернет», «Енэж веркӧсӧдз», «Лэбам» да мукӧд выль сьыланкыв.
Зэв аслыспӧлӧса юргис, выль ног вӧчӧмаӧсь аранжировкасӧ да, «Бур батькӧд-мамкӧд олӧм». Кыдзи висьталісны Оля Сан да Андрей Епанешников, налы окота выль ногӧн петкӧдлыны важ коми сьыланкывъяссӧ. Мед пӧ найӧ эз кольны пӧль-пӧч кадӧ, а юргисны ӧнія том йӧзлӧн олӧмын.
Комиын Оля Санӧс бура тӧдӧны. Коркӧ сійӧ ворсліс вужвойтырлӧн шылада-драмаа театрын да, дерт, сьыліс. Творчествоыс сылӧн сэки нин вӧлі аслыспӧлӧс. Оля Сан сьыліс комиӧн разнӧй стильын, мый вӧлі коми шылада искусствоын выльторйӧн.
Оля Санлӧн да Андрей Епанешниковлӧн «Йӧктам ставӧн Сыктывкарын» программаыс шызьӧдіс ставнысӧ. А сэсся 2013 воын Оля Сан вуджис овны Екатеринбургӧ. Кыдзи ачыс висьтавліс сэки, мед сӧвмыны творчествоас.
–Оля, зэв нимкодь бара аддзыны тэнӧ Сыктывкарын, миян радейтана театрын. Эска, мый тайӧ абу ӧти концерт…
–Меным окота лои бӧр локны театрӧ, сьывны тані, выль удж- тасъяс дасьтыны. Ӧні ме тані. Босьтісны вужвойтырлӧн шылада-драмаа театрлӧн труппаӧ, пырӧдча нин спектакльясӧ. Ӧні пырӧдча «Шуйгунӧ». Сэні кута и сьывны, и йӧктыны…
–Сэні тэнад дзонь реплика: «Казакъяс!» Сэсся пыра нин ме, – пырӧдчыліс сёрниӧ Андрей Епанешников.
–Екатеринбургын ме гижи уна сьыланкыв да, ӧні буретш воис кад ставсӧ тайӧс петкӧдлыны видзӧдысьлы, — водзӧ висьталӧ Оля Сан. – Екатеринбург, дерт, ыджыд роч кар, та вӧсна гижи и роч сьыланкывъяс, но коми йылысь ме некор эг вунӧдлы. Ӧтуввез пыр петкӧдлі ассьым творчествоӧс и.
–Ӧтуввезйын сьылӧм али ловъя видзӧдысь водзын петкӧдчӧм, мый ёнджыка вӧрзьӧдӧ?
–Дерт жӧ, тайӧ ёна торъялӧ. Ӧтув-везйын тэ он аддзы кывзысьтӧ, кӧть и эм лыдпас, мыйтаӧн видзӧдӧмаӧсь, личкӧмаӧсь «сьӧлӧмчик». А ӧні ме аддзи йӧзлысь шоныд синъяссӧ, нюмсӧ, тыдалӧ, коді кыдзи кывзӧ. Дерт, таысь зэв нимкодь.
–Оля, тэ дыр кад мысти петін ас сцена вылӧ. Дерт, тэнӧ тӧ-дысьяс интересуйтчисны мӧд карын тэнад творческӧй уджӧн. Но тэ воин татчӧ, кылін, мый тэнӧ тані виччысьӧмаӧсь, мый тэ тані колана?
–Дерт жӧ! Со залас пукалысь мужичӧй висьталіс. Ме пӧ аддзи ӧтуввезйысь, мый лоас концертыд и пыр жӧ локті. Нимкодь!
–Сыктывкарӧ воӧм бӧрын «Шудлы шуДа» – медводдза концерт. Водзӧ вылӧ кутшӧмкӧ мӧвпъяс эмӧсь?
–Ми кӧсъям ёна чуймӧдны йӧзсӧ выль сьыланкывъясӧн, выль пыртӧмъясӧн, но тайӧ гусятор на. Ставыс тыдовтчас бӧрынджык. Зэв бур, мый миян шылада-драмаа театрын енбиа йӧзыс уна да тшӧтш кӧсйӧны отсасьны миянлы. Сідзкӧ, водзын уджыс вывті уна. А ми дасьӧсь.
–Андрейкӧд тані сёрнитінныд шуд йылысь. Ме да и унаӧн мукӧд, тіянӧс вӧлі тӧдӧны кыдз гозъяӧс. Ӧні тіян костын творчество кындзи мыйкӧ эм? Миянӧс лыддьысь кӧсйӧ тӧдны и та йылысь…
–Ок, кутшӧма тэ гартыштін, – бара сёрниӧ пырӧдчис Андрей Епанешников.
А сэсся видзӧдліс зэв мелі синъясӧн Оля вылӧ да юаліс сылысь: «Висьталам?»
–Ми бӧр лоим семья, олам ӧтлаын. И «Кад» выль сьыланкывйыс артмис тані нин, гижим ас студияын.
Екатерина МАКАРОВА.