«Коми му» газетлӧн сентябрь 3 лунся петаслӧн медводдза лист бокын ми тӧдмӧдім лыддьысьысьясӧс Сергей Ануфриевкӧд – «ЛУКОЙЛ-Коми» мусир перъян котырысь операторкӧд, да тшӧтш висьтыштім и сылӧн хобби – фотографируйтӧм йылысь. Вайӧ матӧджык тӧдмасям тайӧ енбиа мортыскӧд.
Казьтыштам, Сергей чужлӧма Изьва районса Діюрын, кытчӧ и поздысьӧма семьянас. Гӧтырыскӧд инӧн-ла-дӧн быдтӧны куим ныла-пиаӧс. 15 во нин Сергей зільӧ
«ЛУКОЙЛ-Коми» котырын. А таӧдз, Печораса речнӧй техникум помалӧм бӧрын кык во уджалӧма Печора ю вылын, а сэсся недыр асфальт-битум заводын. Ичӧт удждон пондаыс и босьтчӧма корсьны мӧд удж. Шуд вылӧ буретш «ЛУКОЙЛ-Комиын» колӧны вӧлӧм содтӧд уджалысьяс, со и веськалӧма сэтчӧ.
Уджыс эськӧ вахтаӧн ветлӧмӧн лыддьыссьӧ, но Сергейлы мойвиӧма – гортас волывлӧ. Уджъёртъясыс олӧны Щельяюрын, а найӧс машинаӧн новлӧдлӧны местаӧдзыс да Діюр сикт пыр муніганыс босьтӧны тшӧтш Сергейӧс. Кык вежон уджалӧ, кыкӧс – шойччӧ.
–Тадзисӧ меным кивыв, – висьталӧ Сергей. – Удита и горт овмӧсын бергӧдчыны, и карӧ ньӧбасьны да нӧшта мукӧдлаӧ ветлыны. Вель унатор кык вежоннас вӧча.
Кыдз пасйылім нин газетын воддза гижӧдас, прӧст кадӧ Сергей радейтӧ фотографируйтны: сылӧн мичасьыс- мича снимокъясын петкӧдчӧ чужан мулӧн, войвывса вӧр-валӧн аслыспӧлӧслуныс да шемӧсмӧдана мичыс. Мед кӧть и шуӧ асьсӧ «фотограф-любительӧн», сылӧн снимокъясӧн нимкодясьӧны оз сӧмын ас районын, но и республика пасьталаын.
Фотографируйтны радейтӧмыс Сергейлы вуджӧма Владимир Егорович батьсяньыс, коді зэв дыр снимайтчӧма.
–Коркӧ батьлы козьналісны фотоаппарат, эз весиг профессиональнӧйӧс, сідз шусяна ручнӧй режимаӧс, – казьтылӧ Сергей. – Бать и вӧзйис меным, вай пӧ видлы, кыдзи снимайтӧ да кутшӧм мукӧд позянлун сылӧн эм. Мыйтакӧ фотографируйті сыӧн, интернетӧ некымын фото пукті. Видзӧда да, йӧзыслы кажитчисны, вочасӧн и корны кутісны, кӧнӧсь пӧ снимокъясыд, Ануфриев?! Но бур, мися, лоасны. Сэсся и аслым фотоаппарат ньӧби да ньӧжйӧникӧн куті водзӧ снимайтны. А коркӧ войнас виччысьтӧг штативтӧг, ки помысь артмис войвыв кыа снимайтны, та бӧрын ыззи, кыдзи эськӧ нӧшта бурджыка да колана ногӧн вӧчны татшӧм снимоксӧ. Интернетын ёна лыддьыси-корсьыси, уна видео видзӧді, торйӧн нин кӧні войвывлӧн аслыс-пӧлӧс мичлуныс воссьӧ.
Збыльысь, кор видзӧдалан Сергей Ануфриевлысь снимокъяссӧ – пыр и казялан, мый сылӧн вель уна снимок вылын буретш войвыв кыа пӧртмасьӧ: и чужан сикт, и пемыд вӧр, и би сюръя да весиг мусир перъян вышка весьтын сійӧ дзирдалӧ.
–Войнас уджавнытӧ меным весиг кивыв: шуам, войвыв кыалысь да ыджыд тӧлысьлысь аслыспӧлӧс мичсӧ буретш войнас и аддзывлан, – тӧдчӧдӧ Сергей.
Колӧ пасйыны, мый Сергей Ануфриев аслас снимокъясӧн пырӧдчӧма ставроссияса конкурсӧ, кодӧс котыртӧма РФ-са энергетика министерство. Ышӧдӧмаӧсь пырӧдчынысӧ буретш «ЛУКОЙЛ-Комисянь». Сергей ыстӧма зэв шоча паныдасьлан кадръяс: аслыспӧлӧс войвыв кыа, иридиумлӧн югнитӧм. Дзик ӧти снимокӧн финалӧдз нин воӧма, кольӧма сӧмын помшуӧмсӧ виччысьны, но мыйлакӧ дугӧдӧмаӧсь конкурссӧ. Вочакывйыс тай абу на воӧма-а.
Кутам лача, Сергей Ануфриев и водзӧ, да, гашкӧ, ёнджыка на, нимкодьӧдас миянӧс аслас шемӧсмӧдана выль мича снимокъясӧн…
Инесса ОРЁЛ, Галина МАКАРОВА.