Комиысь ставроссияса «Народнӧй фронтын» водзмӧстчысьяс шыӧдчӧмаӧсь Сыктывкарса администрацияӧ, медым найӧ дзоньталасны Читын туй.
Кыдзи висьталӧны «фронтӧвикъяс» юркарса чинаяс кӧсйысьлӧмаӧсь нин лӧсьӧдны Читын туйсӧ 2020 вося августӧдз. Шуӧмаӧсь, мый гуранъяссӧ тыртасны асфальт-бетон сорасӧн, но сідз нинӧм абу и вӧчӧмаӧсь.
Мый туйыс шогмытӧм на, та йылысь «Народнӧй фронтӧ» юӧртӧмаӧсь Читын олысьяс.
–Тані уна ас керка. Сэні олысьяслы Пермскӧй уличасянь да «Корзинка» лавкасянь кӧрт туй вуджа-нінӧдз ветлынысӧ оз шогмы. Микрорайоныс Сыктыв ю бокын. А сэтчӧс уличаясӧд некод оз письт мунны, туй пасьталаыс керъяс чурвидзӧны да. Найӧс коркӧ туйсӧ лӧсьӧдыштӧм могысь жӧ и пуктавлісны. Ӧні ставыс вежнясьӧма да, гырысь машина ӧдва мунӧ. Таксистъяс Читӧ оз кӧсйыны нуны, – элясьӧны йӧзыс.
–Миян керканым медуліас, ю бокын. Сэні жӧ посни челядя семьяяс олӧны и. Керка дорӧдз машинаӧн воӧдчыны он вермы. Челядьӧс ни детсадйӧ, ни школаӧ, ни больничаӧ нуӧдны он вермы.
Ми ог корӧй, мед асфальт вольсалісны, вывті кӧ нин сійӧ дона. Кӧть нин мед чурвидзысь керъяссӧ перйисны, посньӧдлӧм изйӧн гуранъяссӧ тырталісны либӧ нӧшта кыдзкӧ шыльӧдісны. Асьным тайӧс вӧчны ог вермӧй, торъя техникаыс абу да. Кымынысь нин шыӧдчылім юркарса администрацияӧ! Сэні пыр такӧдӧ-ны, эскӧдӧны, мый туйсӧ лӧсьӧдасны, но уджӧ оз и босьтчыны. Отсалӧй, пӧжалуйста, миянлы, – кевмысьӧ став олысь нимсяньыс Читысь Анна Сивкова.
Сыктывкарса администрацияысь чинаяс збыльысь кӧсйысьлӧмаӧсь туйсӧ дзоньтавны.
2020 вося июнь 25 лунӧ мэриясянь письмӧын юӧртӧмаӧсь, мый ЖКХ управлениеын уджалысьяс ветлӧмаӧсь Читӧ да ас синнаныс видзӧд-лӧмаӧсь шогмытӧминсӧ. Чит микрорайонса 19Ӧ1 номера керка дорсянь кӧрт туй вуджанінӧдз жугласьӧма асфальт-бетона чорыд веркӧсыс. Сідзжӧ чинаяс пасйӧмаӧсь чурвидзысь керъяссӧ. И администрациясянь юӧртӧмаӧсь, мый муниципалитетлӧн «Туй овмӧс» казённӧй предприятие тыртас-шыльӧдас став гурансӧ асфальт-бетон торпыригӧн. Дзоньтасян уджсӧ шуӧмаӧсь сигӧрт-ны 2020 вося июль 30 лунӧдз.
Ӧні сентябрь шӧр нин. «Народнӧй фронтын» водзмӧстчысьяс на дорӧ йӧзлӧн шыӧдчӧм бӧрын Читӧ ветлӧмаӧсь. И тыдовтчӧма, мый туйыс сэні кутшӧм шогмытӧм вӧлӧма, сэтшӧм на и ӧні, нинӧм абу вежсьӧма.
–Кутшӧм эськӧ вӧлі бур, чинаяс кӧ татшӧма эз пӧръявны йӧзсӧ. Кӧсйысисны кӧ – колӧ вӧчны. Ми шыӧдчим Сыктывкарса администрацияӧ, мед найӧ лючки дзоньталасны Читын туйсӧ кӧдздӧдтӧдз на. Пасъям, тайӧ туйсӧ пыртӧма «Дорожная инспекция ОНФӦКарта убитых дорог» интерактивнӧй карта уджтасӧ. Шыӧдчим чинаяс дорӧ и сы могысь, мед водзӧ кежлӧ корсясны сьӧм дзоньтавны Читын туйсӧ капитальнӧя, – юӧртіс регионса ОНФ-лӧн штабӧ пырысь Елена Иванова.
Екатерина МАКАРОВА.