Пандемияыд муртса лӧньыштіс да, ставӧн босьтчисны артавны сы понда ассьыныс воштӧмсӧ. И лыдпасъясыс, колӧ шуны, ёна повзьӧдланаӧсь.
Со, кыдз юӧртӧ Ростуризм, туристалан бизнеслысь коронавирусыд «апыштӧма» ӧтиӧн-джынйӧн триллион шайт. Мед пӧ тайӧ сьӧмсӧ бӧр бергӧдны, ковмас мырсьыны воӧн-джынйӧн, оз кӧ быттьӧ выль ускӧттьӧ бара на ставнымӧс су.
Мед кыдзкӧ-мыйкӧ турфирмаясыдлы тшӧтш отсыштны, Россияса правительство ышӧдӧ миянӧс шойччыны ас странаын. Сідз, август 21 лунсянь да во помӧдзыс налы, кодъяс оз мунны Турция-Египетӧ, а гожйӧдчасны асланым саридз дорын либӧ нимкодясясны татчӧс мичаинъясӧн, шойччӧм вылӧ рӧскодсьыс сьӧмсӧ бӧр неуна бергӧдыштасны.
Колӧ казьтыштны, татшӧм акциясӧ Россияын думыштлісны нуӧдны 2013 воын нин. И со сизим во юр жуглісны, кыдзи да мый кутасны вӧчны. Гашкӧ, та дыранад кодлыкӧ и вичмыштліс сьӧмторйыс, но та йылысь юӧрыс ёнасӧ эз паськавлы. И со ӧні татшӧм сідз шусяна кешбэксӧ збыльысь кӧсйӧны сетавны. Но, кыдзи и пыр, оз быдлаын шойччӧмысь да оз ставныслы сійӧ вичмы…
Сідз, мынтысясны налы, кодъяс август 15 лунсянь декабрь 20 лунӧдз вит лунысь оз этшаджык шойччыны 45 регионын, сы лыдын Архангельск, Воронеж, Иваново, Новосибирск, Свердловск, Хабаровск да мукӧд обласьтын, а сідзжӧ Бурятияын, Татарстанын, Хакасияын, Удмуртияын…
Комиӧс первойсӧ на лыдӧ абу вӧлі пыртӧмаӧсь, но сэсся содтӧмаӧсь жӧ.
11 регионын, на лыдын Краснодар да Ставрополь крайяс, а сідзжӧ Крым, вештысясны сӧмын октябрь 1 – декабрь 20 лунъясӧ шойччӧмысь.
Мед бӧр бергӧдасны сьӧмсӧ, бытьӧн колӧ шойччыны 5 лунысь (4 войысь) оз этшаджык, овмӧдчыны гостиницаӧ (ю вывті кӧ кывтан – паракод вылын), мед путёвкаыд вӧлі 25 сюрс шайтысь эз донтӧмджык да сыысь мынтысьӧма «Мир» картаӧн. 25-50 сюрс шайта путёвкаысь вештасны 5 сюрс, 50-75 сюрсысь – 10, 75 сюрсысь донаджыкысь – 15 сюрс (и тайӧ медунаыс, мыйта бӧр бергӧдасны).
Республикаса культура, туризм да архив удж кузя министр Сергей Емельянов шуис, мый Комиын, торйӧн нин Маньпупунёрын шойччӧмыс зэв дона, и позяс бӧр асавны 12 сюрс шайт.
Ёна-ӧ татшӧм выльтор вылас кутасны усьласьны йӧзыс, во помнас тыдовтчас…
Анжелика Елфимова.