Чилимдін сиктса выль детсадйын ставыс нин дась зонпоснилӧн воигкежлӧ. А воссяс сійӧ сентябрь 1 лунӧ.
Казьтыштам, челядьлы тайӧ выль учреждениесӧ кыпӧдісны некымын во. Уджсӧ падмӧдіс воддза пӧдрадчикыс, кодкӧд контрактсӧ киритісны 2017 вося майын.
И сэки муниципалитетлы отсӧг вылӧ воисны мусир перйысьяс. Коми Республикаса правительство да «ЛУКОЙЛ» ПАО костын ёртасьӧм йылысь сёрнитчӧм серти вӧлі шуӧма вичмӧдны детсадсӧ помалӧм могысь колана мында сьӧм.
Кольӧм лунъясӧ Чилимдін районӧ удж кузяыс волігӧн выль стрӧйбасӧ донъяліс Коми Республикаӧн веськӧдлысь Владимир Уйба.
Стрӧитчан уджсӧ сэні эштӧдӧмаӧсь нин, ставыс дась челядьӧс примитігкежлӧ. Коли сӧмын босьтны зонпосниӧс велӧдан-воспитайтан удж вӧчӧм могысь лицензия.
Кык судтаа выль стрӧйбасӧ артыштӧма квайт группаын дзолюкъясӧс видзӧм вылӧ, сідзжӧ сэні кык зал – спортивнӧй да музыкальнӧй, пусянін да нуръясянін, медкабинет, прачечнӧй.
Детсад восьтӧмсӧ торйӧн нин виччысьӧны Чилимдін сиктса выль микрорайонъясын олысь посни челядь.