Республикаса юралысьлысь удж вӧчысь Владимир Уйба аддзысьліс регионса «Стажёр» проект серти зільысь-водзмӧстчысь том йӧзкӧд да сеталіс налы дипломъяс.
Казьтыштам, тайӧ уджтассӧ вӧлі дасьтӧма сы могысь, медым ышӧдны том специалистъясӧс уджавны исполнительнӧй власьт тэчасын. Та могысь проектас пырӧдчысьяс во чӧж стажируйтчӧны республикаса министерство-ведомствоясын.
«Стажёр» уджтасыс пӧртсьӧ олӧмӧ квайт во нин. Конкурс серти проектас пырӧдчӧны вуз помалысьяс, кодъяслы абу на тырӧма 27 арӧс. Во чӧж том специалистъяс тӧдмасьӧны республикаса министерство-ведомствояслӧн уджӧн да аслыспӧлӧслунӧн, ӧтиас куим тӧлысь зільӧмӧн. Быд стажёрлы вичмӧдӧны наставникӧс.
Кольӧм квайт воӧн том специалистъяс стажируйтчисны 19 министерство-ведомствоын. На пиысь комын витыс лоисны проектас вермысьясӧн. Кызь кӧкъямысӧс босьтісны удж вылӧ госуправление тэчасӧ.
«Стажёр» проектса куратор, республикаса юралысьлӧн администрацияӧн веськӧдлысь Дмитрий Самоваров пасйис, мый тайӧ уджтасас быд во зільӧны пырӧдчыны зэв унаӧн, ӧти местаас вӧзйысьӧны шӧркодя квайтӧн.
–Том йӧз пыдісянь тӧдмасьӧны власьт тэчаслӧн уджӧн и та дырйи вочасӧн гӧгӧрвоӧны, мый налы медтӧдчана асланыс профессияын. А во чӧж стажируйтчӧм бӧрын кокниа да окотапырысь босьтчӧны кӧть кутшӧм министерствоын уджӧ, – пасйис Дмитрий Самоваров.
Сідз, Глеб Таличкин стажируйтчис экономика, а сідзжӧ энергетика, жилищно-коммунальнӧй овмӧс да тарифъяс министерствоясын.
–Кураторъяскӧд да наставникъяскӧд топыд йитӧдыс отсаліс меным босьтны содтӧд тӧдӧмлун да бурмӧдны профессия серти уджалан сямӧс, – висьталіс том специалист. – Ме збыльысь мӧді гӧгӧрвоны, кутшӧм тӧдчана, кывкутана да колана госслужащӧйлӧн уджыс. И лоис зэв нимкодь, кор менӧ корисны уджавны жилищно-коммунальнӧй овмӧс министерствоӧ.
* * *
2020-2021 воясся сезонӧ «Стажёр» проект збыльмӧдны кутас вит том специалист. Тайӧ лунъясӧ найӧ босьтчисны нин уджавны регионса министерство-ведомствоясын.
Снимокыс ӧтуввезйысь.