Кыдзи дасьтысьӧны республикалӧн 100 вося юбилей кежлӧ Сыктывдін, Кӧрткерӧс, Кулӧмдін, Емдін, Мылдін да Княжпогост районъясын, та йылысь сёрни вӧлі июль 6 лунӧ республикаса юралысьлӧн администрацияын чукӧртчылігӧн.
–Миянлы колӧ эрдӧдны мытшӧдъяс да видзӧдлыны, кыдзи найӧс позьӧ венны, – висьталіс сёрнисӧ панігӧн Владимир Уйба. – Дерт, колӧ и гажӧдчыны, фейерверкасьны, но колӧ и йӧзлысь олӧмсӧ бурмӧдӧм, каръяс да районъяс выльмӧдӧм кузя тӧдчана уджтасъяс збыльмӧдны.
Сыктывдін районын мытшӧдъяссӧ воськов бӧрся воськов зільӧны венны. Сідз, Зеленечын 2019 воӧ дзоньталӧмаӧсь шыладӧ велӧдан школа, а таво ньӧбӧмаӧсь сэтчӧ пызан-улӧс да мукӧд эмбур. Районса администрацияӧн юрнуӧдысь Любовь Доронина висьталіс, республикалы 100 во тыригкежлӧ дасьтысигӧн пӧ миянлы колӧ на дзоньтавны туйяс, могмӧдны йӧзсӧ сӧстӧм юан ваӧн да мынтӧдчыны борщевикысь.
Кӧрткерӧс районын дасьтӧны социальнӧй тӧдчанлуна 9 стрӧйбалы проект, 2021 воын кӧсйӧны Шойнатыын да Адзорӧмын кыпӧдны клубъяс, Одыбын – лызьӧн котраланін, а Кӧрткерӧсын выльмӧдны культура да прӧст кад коллялан шӧрин.
Эжва йылын мӧвпалӧны збыльмӧдны вӧр юкӧнын да видз-му овмӧсын инвестицияа уджтасъяс, медым лӧсьӧдны йӧзлы выль уджаланінъяс. Кыдзи висьталіс Кулӧмдін районса администрацияӧн веськӧдлысь Сергей Рубан, бӧръя вит вонас пӧ восьтім вит выль скӧт карта, регыд эштӧдам нӧшта кыкӧс. Фермеравны босьтчысьяслӧн шӧркодь арлыдыс – 26 арӧс, сідзкӧ, том йӧз кольччӧны сиктӧ да уджалӧны му-видз вылын, и районса власьт быд ногыс зільӧ отсавны налы.
Экология боксянь сӧстӧмӧн петкӧдчӧ Мылдін район. Республикалӧн юбилей кежлӧ сэні кӧсйӧны лӧсьӧдны лӧп-шыблас сӧвтан-ректанін. Та кындзи и туризм сӧвмӧдӧны. Кык вонас ӧтчыд Гришестав грездын нуӧдлӧны «Сено» фестиваль, и мед пӧ унджык гӧсьт сэтчӧ воліс, гажсӧ колӧ республикаса тшупӧдаӧн шуны.
Емдін районын збыльмӧдӧны йӧзӧс ваӧн могмӧдан проект. Райадминистрацияӧн веськӧдлысь Галина Плетцерлӧн кывъяс серти, Микуньын ва видзанін да водопровод стрӧитӧм, Айкатыласа Жижев уличаӧдз ва вайӧдӧм могысь вель уна сьӧм нин корсьӧмаӧсь-судзӧдӧмаӧсь.
Республикаса юбилей кежлӧ дасьтысигӧн Княжпогост районын «Йӧзкостса бюджет» серти збыльмӧдӧны 9 миллион шайт дон 12 уджтас. Емваын дзоньталасны школа да детсадъяс, Чимиавӧрӧкын да Туръяыбын стрӧитасны кусӧдчысьяслы ва чукӧртанінъяс, Емваын сувтӧдасны тренажёръяс, а Мещураын лӧсьӧдасны спортплощадка.