Син лапнитлігкості ӧти гожся тӧлысь кытчӧкӧ лэбыштӧма нин! Он и тӧдлы, мӧд кыкыс бӧрсяньыс югнитасны. И бара воас ар – велӧдчан кад.
Коронавирус понда бӧръя кык велӧдчан тӧлысьнас став школа-вузсӧ вуджӧдісны сідз шусяна дистанционка вылӧ. Со бать-мам и ӧюртӧны, мыйла, ӧні некод налы веськыда оз висьтав, мунас-ӧ быдтасныс школа-институтӧ али бара гортсяньыс пондас велӧдчыны.
Россияысь минпросвещениесаяс да рособрнадзорсаяс шуӧны, мый челядь мунасны нин школаад, но сэк жӧ кывсьӧ, сэні пӧ мый вынсьыс уджалӧны-дасьтысьӧны и водзӧ нуӧдны дистанционкатӧ: вынсьӧдӧны содтӧд индӧдъяс, кӧнсюрӧ велӧдчанінъяссӧ могмӧдӧны выль оборудованиеӧн, дасьтӧны велӧдысьяслы выль корӧм-тшӧктӧмъяс, судзсьытӧма олысь семьяяслы вичмӧдӧны планшетъяс да с.в.
Июнь заводитчигӧн Россияса ректоръяс союзлӧн чукӧртчылігӧн правительствоса премьер Татьяна Голикова шуӧма, мед пӧ выль велӧдчан во кежлӧ странаса став вузыс лоас дась пыртны дистанционнӧй режимтӧ. Код тӧдас пӧ, мый кутас вӧчны коронавирусыд. Эпидемиологъяс серти пӧ, вермас арся грипп дорад тшӧтш пысасьны…
Мам-бать челядьнысӧ тадзи велӧдчӧмыдлы паныд кырымалӧны ӧтуввезйын петицияяс, но код нӧ да кор кывзывліс йӧзтӧ?..
А ӧд буретш бать-мам тӧдӧны, эм-ӧ тӧлкыс гортсянь велӧдчӧмсьыд. Торйӧн нин сэк, кор ни велӧдысьяс, ни челядь та дорӧ ньӧти абу дасьӧсь! Бара пӧ, сідзкӧ, оз велӧдчӧм ло, а куш нимыс! Ныв-зон бара кутасны лунтыръясӧн зунясьны компьютер водзын, учебникысь лист бокъяссӧ гӧгӧрвотӧг гижавны тетрадяныс, а задача вылас вочакывсӧ корсьны «решебник» да верстьӧ отсӧгӧн. А ӧд Роспотребнадзор ачыс ӧлӧдӧ, мый быдмысь мортлы экран водзын позьӧ пукавны луннас сӧмын 40 минут… Сэсся быд кагалы быть лоӧ пырӧдчыны «ВКонтактеӧ», кӧть эськӧ, оланпас серти, сэтчӧ гижсьыны позьӧ сӧмын 14 арӧссянь. И кор бать-мам оз видзӧдны быдтас бӧрсяыс, найӧ сэні мыйсӧ сӧмын оз вӧчны!
Но та вылӧ видзӧдтӧг, оз кӧ таво нин, дистанционканад век жӧ, буракӧ, мырдӧналасны миянӧс.
Со Россияса минпросвещение арнас дас нёль регионын лӧсьӧдчӧ нуӧдны ӧткымын школа-колледжын та кузя эксперимент. На лыдӧ веськалӧмаӧсь Алтай да Перым край, Астрахань, Калининград, Калуга, Кемерово, Москва, Улыс Новгород, Новгород, Новосибирск, Сахалин, Тюмень, Челябинск обласьтъяс да Ямал-Ненеч кытш. Сэтчӧс велӧдчанінъясӧ пӧ нюжӧдасны ыджыд ӧда ӧтуввез да вичмӧдасны колана мында компьютер.
Тайӧ экспериментсӧ кӧсйӧны нуӧдны 2022 вося декабрь помӧдз, и артмас кӧ пӧ, сэсся ставным нин босьтчам «цифраӧн» велӧдчыны.
А кутшӧмӧн быдмасны тӧдӧмлунтӧ тадзи босьтігад миян челядь, гырысь чинаяслы веськодь. Ӧд налӧн ныв-пияныс кыдзи и водзті, мунасны велӧдчыны суйӧрсайса школа-колледжӧ.
Анжелика Елфимова.