Районъясӧ уджмогъясӧн ветлігӧн республикаӧн веськӧдлысь Владимир Уйба аддзысьлӧ сикт-грездын олысьяскӧд, тӧдмасьӧ налӧн тӧжд-могӧн. Йӧзкӧд сёрнитігӧн сійӧ висьтавлӧ, кутшӧм выль стрӧйбаяс кыпаласны матысса кадӧ нин кар-районъясын.
Сідз, Сыктывдін районса Выльгортын июнь-июльын нин лӧсьӧдасны ГТО нормативъяс сдайтан спортплощадка. Сьӧмсӧ вичмӧдасны «Демография» нацпроект серти.
Октябрӧдз республикаса бюджет тшӧт весьтӧ дзоньталасны Сыктывкар – Киров трассасянь Луздор районса Кыддзавидз посёлокӧдз 3,8 километр туй.
Федеральнӧй бюджетысь сьӧм вылӧ Сыктыв районса Первомайскӧй посёлокын кыпӧдасны амбулаториялы выль стрӧйба.
Сосногорск районса Уквавом сиктын заводитісны стрӧитны социокультурнӧй шӧрин. Сэні лоасны концертасян зал, небӧг видзанін да мукӧд жыр. Шӧриныс меститчас мичаинын, и фестиваль-гажъяссӧ позяс нуӧдны и ывлаын.
Изьва районса Сизябын вӧчасны челядьлы ворсанін, выльмӧдасны школаӧдз вайӧдан пу сод. «Комфортная городская среда» федеральнӧй уджтас серти таво Изьва районын збыльмӧдасны 30 миллион шайт дон 13 проект.
«Образование» нацпроект серти республикаса да меставывса бюджетъясысь сьӧм вылӧ Вуктыл районса Дутовын стрӧитӧны 60 велӧдчысьлы да ичӧт арлыда 20 зонпоснилы школа-сад. Ве-лӧдчаніныс дась 37 прӧчент вылӧ, но тувсовъя ытваыс кырӧдіс туйяс да, стрӧительяс эз вермыны вайны налы коланасӧ.
Та вӧсна уджыс джӧмдіс. Республикаса юралысьлысь удж вӧчысь тшӧктіс ӧддзӧдчыны да ас кадӧ эштӧдны стрӧйбасӧ.