Айму вӧсна Ыджыд тыш дырйи миян страна воштіс 27 миллион мортӧс. Найӧс казьтыштӧм могысь «Сад памяти» акция дырйи страна пасьтала садитӧны 27 миллион пу. Акцияас пырӧдчис и Коми Республикаса юралысьлысь удж вӧчысь Владимир Уйба.
–Великӧй Отечественнӧй война дырйи Ленинград дорйигӧн 1942 воӧ усьӧма менам пӧльлӧн вокыс, а 1944 воӧ – ыджыд батьӧй. Та вӧсна меным зэв тӧдчана пырӧдчыны тайӧ акцияас, – висьталіс республикаӧн веськӧдлысь. – Пу садитӧм – олӧмсӧ водзӧ нуӧдӧм. Тайӧ петкӧдлӧ, мый бурыс венӧ лёксӧ. Быд война сьӧкыд да вир кисьтана, уна йӧзлысь сьӧлӧмсӧ дойдӧ, но помасяс сійӧ да локтас морт, коді быдтас сад. Дзоридзалӧ кӧ сад, сідзкӧ, олӧмыс мунӧ водзӧ.
Комиын «Сад памяти» акцияыс мунӧ быд муниципалитетын. Ӧні кежлӧ пуктӧмаӧсь нин ветымын сюрс сайӧ пу.
Садитны пусӧ позьӧ и ас йӧрын да #СадПамятиДома хештегӧн пасйыны та йылысь соцсетьын. А садпамяти2020.рф лист бокса карта вылын эм позянлун индыны пусӧ да босьтны электроннӧй сертификат.