Княжпогост районысь астролог Ева висьталӧ, мый кодзувъяс серти позьӧ водзвыв тӧдмавны ассьыд водзӧ олӧмтӧ. Сӧмын колӧ гӧгӧрвоны налысь «кывсӧ».
Астрологияыд абу сӧмын зодиак пас
Ичӧтдырйиыс Ева окотапырысь лыддьывлӧма гороскопъяс. Кыдзи ачыс висьталӧ, сылы вӧлӧм интереснӧ, ёна-ӧ лӧсялӧ татшӧм туналӧмыс збыльыскӧд. Весиг тетрадьӧ гижалӧма, кутшӧм этшыс сійӧ либӧ мӧд зодиак паслӧн.
–Шуам, Лев радейтӧ ыджыдавны, Черилы кажитчӧ мистика. Сэсся мӧді гижавны, кутшӧм зодиак пас кыдзи асьсӧ кутӧ сійӧ либӧ мӧд лоӧмтор дырйи. И вӧлі видзӧда тӧдсаяс бӧрся, син улын кута налысь оласногсӧ, ёна-ӧ лӧсялӧ гороскопыскӧд. А ӧтчыд кутшӧмкӧ концерт дырйи тӧдмаси зонкӧд, да сійӧ менсьым пыр жӧ юаліс, коді ме гороскоп серти. Вочавидзи. А сійӧ сэсся гортӧ колльӧдігӧн кызь минут чӧж висьталіс меным, кутшӧм лёкӧсь да дыр лӧгалысьӧсь Скорпионъяс. Тайӧс ме некор ог вунӧд! (Сералӧ – Е.М.). Веськыда кӧ шуны, ме татшӧмсяма сідз шусяна ярлык ӧшлӧмыслы паныд.
–И тайӧ тэнӧ вайӧдіс астрологияӧ? Гашкӧ, вӧлі велӧдысь?
–Ме ачым велӧдча. Отсасьӧ таын ӧтуввез. Стӧчджыка кӧ шуны, сӧмын на заводита велӧдчынысӧ. Тӧдӧмлунӧй абу на ёна уна, и ог на босьтчы быдӧнлы тунавны. Сӧмын тӧдсаяслы лӧсьӧда гороскоп либӧ сідз шусяна натальнӧй карта. Збыльвылас, астрологияыд – тайӧ абу сӧмын зодиак пас, а ёна джуджыд да интереснӧй мир.
Мыйла олам, мыйла колам?
–Кыдзи астрология отсӧгӧн аддзыны шуд? Вермас оз астрология отсавны ӧтка мортлы аддзыны пӧвсӧ? Вочавидзны, мыйла сійӧ чужис да колӧ-ӧ тайӧ вӧльнӧй светас?
–Ме чайта, шудыс быдӧнлӧн ас саяс да аслас. А радейтана мортӧс сӧмын кодзувъяс вылӧ надеяӧн корсьны, думайта, он жӧ вермы. Но позьӧ. Шуам, ныв да зон радейтӧны астрология. Ӧта-мӧдсӧ оз вӧлі тӧдны, да аддзысисны интересъяс серти клубын, астрологиялы сиӧм семинар либӧ лекция вылын. Либӧ нӧшта кутшӧмкӧ, шуам, карликӧвӧй черепаха радейтысьяслӧн клубын да сідз водзӧ.
Да, позьӧ артыштны торъя схема лӧсьӧдӧмӧн, кор тэныд бурджык тӧдмасьны. Та могысь видзӧдлыны, кыдзи сулалӧны планетаяс.
Сёрнитны кӧ сідз шусяна предназначение йылысь, медводз колӧ ассьыд юавны, мый тэныд кажитчӧ, мый сямман да окота вӧчны. А сэсся нин видзӧдлыны гороскопӧ профессия бӧрйӧм могысь. Позьӧ сӧветуйтчыны и ёртъясыдкӧд да рӧдвужыдкӧд.
Но эмӧсь сэтшӧм йӧз, кодъяс пыр майшасьӧны, мый нинӧм оз тӧдны, оз кужны либӧ тадзи чайтӧны. Лыддин гороскоп, кытчӧ, шуам, гижӧма, мый тэ верман бура уджавны криминалистикаын – мун да велӧдчы.
–Ева, рочасьыштны кӧ, тэнад эм «не навреди» принцип, мед дзикӧдз оз повзьы мортыс? Эм-ӧ астрологлӧн мог сы дорӧ шыӧдчысьӧс кыдзкӧ «программируйтны» удача вылӧ?
–Мортыд – вежӧра, ачыс вермӧ бӧрйыны, вӧчны сідз либӧ тадз. Но кодсюрӧ, мый висьталан, сыӧ и эскӧ. И ме эськӧ видлі татшӧмсӧ, кыдзи ті шуанныд, «программируйтны удача вылӧ». Мед эскис да сэсся сылӧн ставыс артмис.
«Пукалӧй гортын!»
–Ёна-ӧ стӧчӧсь «кодзула велӧдӧмъясыс»? Кыдзи найӧс правильнӧ гӧгӧрвоны, мед он сорсьы?
–Збыльвылас, колӧ зэв сюся «лыддьыны кодзувъястӧ». Стӧч вочакывйыс быттьӧ ру пиын да. Весиг Россияын нималана астролог Павел Глоба неуна сорсис, кор шуис, мый 2020 воыс лоас спокойнӧй, некутшӧм гырысь вежсьӧмъяс оз лоны. Думайта, кор лыддян татшӧм туналӧмъяссӧ, прӧстӧ колӧ босьтны найӧс тӧд вылӧ.
–Но астролог вермӧ водзвыв тунавны-тӧдны, мый сэктӧ лоас сэтшӧмтӧ катаклизма, пандемия, кыдзи, шуам, код тӧдас кытысь вужъясьӧм-паськалӧм коронавирусыд?
–Висьтала тай, колӧ зэв бура гӧгӧрвоны, кытчӧ видзӧдны, мед верман «лыддьыны». Но тайӧс абу кокньыд вӧчны. Вермас лоны, ми вокыс мыйсюрӧ и аддзам, но ог ставсӧ лючки гӧгӧрвоӧй. Быттьӧ и казялам кутшӧмкӧ ӧлӧдӧм, но, вермас лоны, ог пысасьӧй, мед тайӧ туйвизьӧдыс водзӧ туясьны.
Веськыда кӧ шуны, 2020 восӧ, кутшӧм лоӧ сійӧ меным да ёртъяслы, эг ёна сюся видзӧд. Но мыйсюрӧ казялі. 2020 во вылӧ ыджыд выныс «нёльӧд керкалӧн». Мый висьталӧ: керка, семья, пукавны гортын… Кор ме арнас мӧвпалі, мися, гашкӧ, локтан воӧ тулыснас кытчӧкӧ ветлыны, вочакывйыс пыр вӧлі усьӧ – «оз позь». Сэки, кольӧмвося ноябрын, эг на гӧгӧрво, мыйла ковмас пукавны меным гортын, мый менӧ вермас «йӧртны» патераӧ. А со тай тыдовтчис….
Дормидонтлы овнысӧ лоӧ сьӧкыд
–Ева, кутшӧм юалӧмъясӧн позьӧ шыӧдчыны астролог дорӧ? Мыйӧн стӧча вермасны отсавны кодзувъяс?
–Йӧзыс медъёна юасьӧны, шуам, кутшӧм кадӧ сылы бурджык босьтны шоперлысь право, ньӧбны машина либӧ патера. Позьӧ видзӧдлыны, ёна-ӧ лӧсялан сійӧ либӧ мӧд морткӧд. Позьӧ тӧдмавны и олӧмын тӧдчана лоӧмторъяс йылысь.
–А колӧ оз кагалы сетны нимсӧ кодзувъяс серти, мед сылӧн олӧмыс вӧлі шуда, ачыс дзоньвидза?
–Дерт, кодзувъяс серти позьӧ бӧрйыны кагалы ним, но, ме думысь, та боксянь колӧ ставсӧ бура гӧгӧрбок мӧвпыштны. Шуам, кодзувъяс «тшӧктӧны» шуны каганытӧ Дормидонтӧн. Но видзӧдлӧй водзӧ вылӧ, кыдзи ӧнія кадӧ Дормидонтлы кутас овсьыны тайӧ нимнас. Сійӧ мӧдас виччысьны, кор нин быдмас да паспорт босьтігӧн вежас нимсӧ. Кагаыд лоӧ шуда да дзоньвидза, бать-мамыс кӧ сы вӧсна кутасны бура тӧждысьны, а оз кодзувъяс вылӧ надейтчыны.
–Тэ шуин, мый лӧсьӧдан гороскоп тӧдсаясыдлы да аслыд. А сійӧ ёна торъялӧ журналъясын йӧзӧдӧмасьыс? Торъялӧ кӧ, то мыйӧн?
—Ӧтчыд ми бур тӧдсакӧд вензим, колӧ-ӧ эскыны быдлунъя туналӧмлы. И сійӧ меным висьталіс, мый коркӧ сылы тунавлӧмаӧсь олӧмсӧ во кежлӧ. Зэв стӧча водзвыв висьталӧмаӧсь и шуда, и шог лоӧмторъяссӧ. Та бӧрын сійӧ лыддьӧ сӧмын шмонитана гороскоп: мед лыддьыны и вунӧдны.
И висьталісны кӧ сьӧкыдлунъяс йылысь, оз ков виччысьны найӧс, асьтӧ йирны, мый ставыс лоас лёк, ставыс пасьмунас… Колӧ лоны дасьӧн венны сьӧкыдлунсӧ. И ставыс лоӧ бур. Шуам, кымӧра кӧ, кытчӧкӧ мӧдӧдчигӧн мыйла он босьт зонтик? Таын и коланлуныс астрология прогнозыслӧн.
Журналын йӧзӧдӧмыс век жӧ мӧрччӧ, шуам, Левлы, Скорпионлы, Девалы… И тэныд либӧ меным мыйкӧ инас, мыйкӧ оз. А кор дасьтан торйӧн аслыд, ставсӧ артыштӧмӧн да урчиталӧмӧн, сэки, дерт, гороскопыд лоас стӧчджык.
Сёрнитіс Екатерина МАКАРОВА.