Финн-йӧгра этнопаркын олысь Моня да Муля йӧраясӧс косявлӧма ош. А Макс нима йӧрапиӧс, коді неважӧн на овмӧдчӧма сэтчӧ, абу вӧрзьӧдӧма.
Тӧвся унмысь палялӧм тшыг ош локтӧма этнопаркӧ май 11 лунся войӧ да веськӧдчӧма йӧртӧдлань, кӧні олӧмаӧсь йӧраяс. Варгыль кока вуджӧма куим метр судта йӧртӧдсӧ. Абу повзьӧма сійӧ и югыд биысь да шыладысь, кодӧс включитлӧны тӧдӧмӧн, мед видзны пемӧсъяссӧ вӧрса зверысь.
–Меным да и тані уджалысьяслы зэв жальӧсь пемӧсъясыс, сэтшӧма радейтім найӧс. Моняӧс да Муляӧс этнопаркӧ вайим Печора-Ылыдзса заповедникысь 2018 вося арын. Сэки найӧ вӧліны пӧшти вит тӧлыссяӧсь. Муляӧс да Моняӧс радейтісны и этнопаркӧ волысьяс. Бур, кӧть Макс ловъя. Йӧрапиӧс мартын на вайӧдісны миянӧ Максаковкаысь, посёлокас вӧлі локтӧма да. Бур, мый и уджалысьяс пиысь некод эз доймав, эз вӧвны сэні да, – висьталіс Сыктывдін районса Ыбын финн-йӧгра этнопаркӧн веськӧдлысь Елена Иванова.
Ускӧттьӧ лунас нин этнопаркӧ волӧмаӧсь туясьны полиция да Паджгаса ветслужбаысь специалист. Ветеринар Олег Габовлӧн кывъяс серти, йӧраясӧс косявлысь ош, кок туй сертиыс, ыджыд.
Лоӧмтор йывсьыс юӧртӧмаӧсь и Коми Республикаса вӧр-ва видзан министерстволӧн охотуправлениеӧ, да ӧні сэтчӧс специалистъяс туялӧны ошкӧс. Аддзасны кӧ – лыясны.
Кынӧмыд кӧ гуръялӧ…
Ошъяс сӧмын на петісны гуысь да, дерт, тшыгӧсь. Вӧрысь кӧ оз сюр нур, сетчӧны сикт-карлань. Неважӧн, май 8 лунӧ, Койгорт районса Гурган грездын олысьяс аддзылӧмаӧсь ошпиӧс. Мамыс пӧ дінас абу вӧлӧма. Но, гашкӧ, кӧнкӧ и неылын тапикасис.
Койгорт районса вӧралысьяс тшӧтш жӧ видзӧдалӧны матігӧгӧрсӧ, мед пармаса кӧзяин йӧз дорын оз пакӧститчы. А сідзжӧ шыӧдчӧмаӧсь олысьяс дорӧ, мед оз шыблавны идӧртӧма вӧлӧга коляс. Сёян дуксӧ ошкыд ылысянь кылӧ.
Коми парма-ягын медся ён да ыджыд зверыс – ош. Сійӧ оз сӧмын вотӧс сёй да турун вуж акляв, а вермӧ вильӧдны и йӧраӧс. Кыдзи со лои этнопаркын. А май заводитчигӧн Печора-Ылыдзса заповедникын фотоловушка казялӧма и каннибал-ошкӧс. Та йылысь юӧртіс заповедникысь учёнӧй Александр Лазников. Сійӧ ас синнас аддзылӧма, кыдзи ыджыд ай ош сёйӧма ас коддьӧмсӧ, а сэсся тыртӧма тушасӧ, тыдалӧ, мӧдысь нуръясьӧм вылӧ.
Александр Лазников уджъёртъясыскӧд видлӧмаӧсь дзебассӧ: сэні вӧлӧма ыджыд ошлӧн жӧ колясыс. Мый вӧлӧма водзынджык, висьтавны стӧча оз куж. Учёнӧй серти, пемӧсъяс вермисны тышкӧ воны. Либӧ ӧтарыс ачыс мыйыськӧ кулӧма, а сылысь шойсӧ нин вильӧдӧма ас рӧдысь жӧ пемӧс.
Екатерина МАКАРОВА.