Аскомысь Россияын медыджыд праздник – Победа лун.
Ыджыд Вермöмсянь 75 во тырöмсö миян странаын шуöма вöлi пасйыны зэв кыпыда и абу öти, а быдса нёль лун.
Ставнас гажас вöлi урчитöма 116 сiдз шусяна мероприятие, сы лыдын, дерт жö, Москваын Гöрд изэрд вылын военнöй парад, Россияса президенткöд войнаса ветеранъяслöн кыпыд аддзысьлöм (приём) да енэж пасьталаын мичасьыс-мича салюта концерт.
Парад вылын петкöдчыны лöсьöд-чöмаöсь матö 15 сюрс военнослужащöй: став войска сикассьыс, а сiдзжö военнöй кытшъясысь да велöдчанiнъясысь. Таысь кындзи мувывса да енэжса – 375 техника.
Тöдса нин öружиеысь öтдор, танi шуöма вöлi став мир водзас ошйысьыштны нöшта кызь сикас выль техникаöн, кодъяс некор на абу мунлöмаöсь Мавзолей дортi. Тайö
С-350 «Витязь» да С-400В4 ракета комплексъяс; пехоталöн «Армата» да «Курганец-25» боевöй машинаяс; «Деривация-ПВО» зениткаяс; биöн коясян «Тосочка» ТОС-2; «Прорыв» Т-90М боевöй танк.
Почёта гöсьтъясöн праздник вылö корöма 356 ветеранöс, на лыдын 156-ыс мортыс – мукöд странаын олысь.
Дерт, эз ло вунöдöма и суйöрсайса государствоясысь гырысь чинаясöс. Медводз корöмсö вöлi ыстöма Дональд Трамплы. Америкаса президент шуöма, мый сылы эськö зэв окота волыны Москваö парад вылад, но öдвакö пö татшöмыс вермас лоны.
Кöсйысьöмаöсь локны Индияысь, Белоруссияысь, Францияысь, Сербияысь, Чехияысь, Киргизияысь, Казахстанысь, Вьетнамысь президентъяс.
Но коронавирус паськалöм понда став мирса историяын тайö зэв тöдчана лунсö шуöма пасйыны сёрöнджык. Кремльын видлалöны та могысь некымын кадпас (дата).
Ставыс кö пö лоö бур, Ыджыд Вермöмтö вермам нимöдны июнь 24 лунö нин. Буретш тайö лунас 1945 воын Москваса Гöрд изэрд вылын вöлi фашистскöй Германияöс вермысь Гöрд Армияысь салдатъяслöн парад. Страналöн историяын сiйö нималö, кыдзи «Парад победителей».
Но вермас лоны, Победа лунсö кутам пасйыны сентябрь 3 лунö, 75 во сайын буретш тайö лунас помасис Мöд мирöвöй война. Кöть эськö, збыльвылас кö, сiйö кусöма сентябрь 2 лунö. И тайöс официальнöя вöлi вынсьöдöма Россияын 2010 воын. Но тавося апрель 1 лунö Госдумаса депутатъяс öтсöгласöн шуисны вештыны Мöд мирöвöй война помасян лунсö да пасйыны сiйöс сентябрь 3 лунö.
Сiдзжö гаравсьö и ноябрь 7 лун. 1941 воын, кор Москва дорын грымакылöма зэв сьöкыд тыш-кось, бара жö Гöрд изэрд вылын нуöдöмаöсь военнöй парад, кодöс видзöдöма ачыс тöварыш Сталин.
Владимир Путин такöд йитöдын тöдчöдiс, кöть пö кутшöм лунö, а Ыджыд Вермöмлы сиöм гажыд лоас.
Сэк жö тавося май 9 лунö Москва весьтö енэжас кыпöдчыласны военнöй самолёт-вертолётъяс, а рытнас Россия пасьталаын кыпыда юргас салют.
Анжелика Елфимова