Россияса Конституцияӧ вӧзйӧма уна вежсьӧм. Миян странаын олысьяслӧн видзӧдлас серти, на пиысь медся тӧдчанаыс — медицина отсӧг сетӧмсӧ бурмӧдӧм йылысь вӧзйӧм.
—Россияын кызвын олысьыс ошкӧ социальнӧй юкӧнлы инмысь вежсьӧмъяссӧ. Сідз, 95 прӧчент респондентыс шуӧ, мый государстволы быть колӧ бурмӧдны медицина учреждениеяслысь уджсӧ, медым быдӧн вермис ёнмӧдны дзоньвидзалунсӧ, — пасйисны йӧзкотырлысь видзӧдлассӧ туялан шӧринын (ВЦИОМ-ын) зільысьяс.
Кыдз тыдовтчӧ, юасьӧмаясысь 94 прӧчентыслы воӧ сьӧлӧм вылас быдмысь войтыр вӧсна ёнджыка тӧж-дысьӧм йылысь мӧвп. Вӧр-ва видзӧм-дорйӧм вӧсна майшасьӧ 93 прӧчентыс, 92%-ыс шуӧны, мый олӧма йӧз-лы пенсиясӧ индексируйтны колӧ быд во, та мындаӧн жӧ кӧсйӧны, мед тӧлысся медічӧт удждоныс, сідз шусяна МРОТ-ыс, вӧлі овны судзсьымӧн мында.
Выль государствояслӧн институтӧн веськӧдлысь Алексей Мартыновлӧн кывъяс серти, коронавируса вуджан висьӧм паськалӧмыс да став мирын экономикалӧн дудӧм-конъясьӧмыс петкӧдлісны, кутшӧм колана да тӧдчана пыртны Оланподулӧ вежсьӧмъяссӧ.
—Йӧзлысь дзоньвидзалунсӧ видзӧм вылӧ колӧ уна сьӧм. Но государство водзын сулалӧ мог, медым быдӧн вермис шыӧдчыны врачьяс дорӧ да мед колана ног бурдӧдісны, — шуис сійӧ.
ВЦИОМ-лӧн туялӧм серти, Россияса войтыр ошкӧны и страналысь асшӧрлун дорйӧм кузя Оланподулӧ пыртӧм могысь вӧзйӧм вежсьӧмъяссӧ. 88 прӧчентыс пӧ шуӧ, мый государстволысь суйӧрсӧ вежны оз позь. Гырысь чинаяслы мӧд государстволысь гражданство босьтӧмлы паныд 83 прӧчентыс, а 88% респондентыс лыддьӧ, мый оз позь торкавны-вежлавны историяысь лоӧмторъяссӧ.
Россияса войтырысь 64 прӧчентыс чайтӧ, мый странаса ӧнія да вӧвлӧм президентъяслы колӧ сетны позянлун бӧрйысьны выльысь, Госдумалысь да Федерация Сӧветлысь тӧдчанлунсӧ содтӧм йылысь висьтасьӧны 51 да 49 прӧчентыс.
* * *
Йӧзлысь видзӧдлассӧ туялан шӧринын зільысьяс йӧзӧдӧмаӧсь тайӧ лыдпасъяссӧ таво апрель 19 лунӧ телефон пыр странаса регионъясысь 1.600 мортлысь юасьӧм бӧрын.