Неважӧн эштӧдіс ассьыс уджсӧ «Югыд ва» национальнӧй паркын войвыв вӧрса кӧръясӧс туялӧм да налысь юр лыдсӧ видзӧм» проект серти котыртлӧм экспедиция. Вӧр-ва видзан ставмирса фондлӧн (WWF) грант весьтӧ збыльмӧдан проектыслӧн мог — туявны Коми Республикаса Гӧрд небӧгӧ пыртӧм пемӧсъяслысь вогӧгӧрся ветлӧм-мунӧмсӧ.
Трекерӧн (сьылі дом) пасйӧм медводдза важенкасӧ (энь кӧр) нимтісны Надеждаӧн. Нимсӧ бӧрйисны эз сідз-тадз: татшӧм туясьӧмыс пӧ отсалас стӧчмӧдны войвыв вӧрса кӧр лыдсӧ да тӧдмавны, кутшӧм мытшӧдъясӧн вочаасьлӧны пемӧсъясыс. Проектсӧ збыльмӧдысьяс кутӧны лача, мый сьыліас дом отсӧгӧн позяс бур-джыка туявны Из бердса кӧръяслысь оласногсӧ, а сідзкӧ, и корсьны найӧс видзан-доръян выль туйвизь.
Талун стӧча абу на тӧдса, мыйта кӧр олӧ паркас, мый найӧ сёйӧны да кыті ветлӧны. Сы вӧсна мый, ӧти-кӧ, «Югыд ваын» уналаӧ техникаӧн он письт, а мӧд-кӧ, тайӧ пемӧсыс зэв вӧй — полысь да видзчысьысь.
Экспедиция дырйи сьылі домсӧ, а стӧчджыка кӧ — ArgosӦGPSӦГЛОНАСС спутникӧвӧй системаӧ йитӧм «Пульсар» радиомаяксӧ — пысалӧма 8 сюрс квадрата километрын паныдасьлӧм некымын стадаысь вит кӧрлы. Котыръясӧн олӧны да, тадзи позяс туявны оз сӧмын пасйӧм пемӧсыслысь, но и ставнас стадаыслысь ветлан туйсӧ.
Надеждаысь кындзи сьылі домсӧ пысалісны кык бычӧлы — Снежоклы да Серёжалы да кык важенкалы — Василисалы да Снегурочкалы. Бӧръяыслы татшӧм нимыс вичмис Mondi Group котырлӧн пас-символ серти: буретш тадзи шусьӧ «Монди Сыктывкарса ЛПК»-ын вӧчан офисын вӧдитчан кабала.
Пемӧсъяслы пысалӧм радиомаякъяссянь юӧрыс спутник пыр кутас воны юӧрсӧ переработайтан шӧринӧ, а сэсянь нин учёнӧйяслы.