2006 вося сентябрь 1 лунö вынсьöдлісны медводдза федеральнöй оланпас, кодöс йöзыс пыр жö нимтісны «дачнöй амнистияöн».
Та бöрын йöзöдлісны нöшта некымын торъя оланпас, кодъясöс öтувтö öтитор: на серти позьö этшаджык документтöг да дженьыдджык кадöн регистрируйтны дача участокад оланін, мукöд стрöйба да на улысь мусö. Кыдзи тайöс вöчны? Мый позьö лэптыны участокад? Позьö-ö сэні кыпöдны вит судтаа керка либö гостиница?
Тайö да мукöд юалöм вылö республикаса юралысьлöн Общественнöй приёмнöйын «веськыд йитöда» телефон пыр сёрнитігöн вочавидзис Сыктывкарса прокурорлöн старшöй отсасьысь Людмила Коновалова.
Казьтышта, сідз шусяна «дачнöй амнистиясö» некымынысь нин нюжöдлісны. Бöръясö вöлі урчитöма помавны 2019 вося март 1 лунö. Но Госдумаса депутатъяс вöчисны кывкöртöд, мый унаöн бара кутшöмкö помка вöсна нюжмасисны да эз удитны гижöдны эмбурсö. Та вöсна кольöмвося июль 25 лунö найö вынсьöдісны «дачнöй амнистия» нюжöдöм йылысь оланпас. Дачаа войтырлы сетісны кад 2021 вося март 1 лунöдз. Мый вежсьö, а мый кольö важ ногыс выль оланпасас?
Кыдз пасйи, «дачнöй амнистияыс» шымыртö некымын оланпас. На серти мутор, кодöс вичмöдлісны мортыслы 2001 вося октябрь 30 лунöдз, воддза моз позьö гижöдны шыöдчöм да сы вылö кутшöмкö документ серти, татшöм мусö кö сетлісны ас овмöс вöдитöм, дача лöсьöдöм, огородничество да садоводство котыртöм, ас гараж да керка лэптöм могысь. Татчö жö веськалöны дача да сад участокын лэптöм гараж (кöзяиныс кö сыöн оз вöдитчы сьöм нажöвитöм могысь), пывсян, беседка, сарай-вевт ув да мудöдтöм мукöд стрöйба. Тайöс позьö вöчны и 2021 воысь сёрöнджык.
Водзті меставывса власьтлысь колö вöлі юасьны, позьö-ö лэптыны дача участокад кутшöмкö выль керка. 2018 вося август 4 лунсянь та йылысь тырмымöн юöртны чинаяслы. Тадз жö колö вöчны комын лун чöжöн стрöйбасö лэптöм бöрын. Керкасö кыпöдны сетсьö дас (!) во. Та йылысь содтöд вöлі пыртöма Россияса Градостроительнöй кодекслöн 51.1-öд да 55-öд статьяясö. Та боксянь немтор жö эз вежсьы.
Ті кö аснаукöн панінныд нин стрöйбасö, сійöс судитчытöг позьö жö гижöдны, тырмымöн та йылысь юöртны карса администрациясалы. Государство быттьö шуö: оланпас торкöмöн кö лэптан либö помалін нин керкасö стрöитны, юöрт та йылысь власьт тэчаслы, и мöдам лыддьыны, мый оланпассö эн торк. Буретш тайöс сетö вöчны 2021 вося март 1 лунöдз урчитöм бöръя «дачнöй амнистияыс».
Участокса керкатö кö öнöдз абу на асэмбуралöма, тайö жö кадöдзыс позьö гижöдны техплан да декларация серти. Тайö жö документъяс сертиыс позьö гижöдны гараж да мукöд стрöйба.
2019 вося август 2 лунö пыртісны вежсьöмъяс сідз шусяна недвижимосьт регистрируйтöм йылысь 267 номера федеральнöй оланпасö, мый серти эмбур гижöдöм могысь декларацияыс оз нин ков, тырмымöн техплан да керка-муöн вöдитчöм вылö право йылысь мукöд документ.
Став тайö вежсьöм-содтöд йывсьыс позьö стöчджыка тöдмавны Россияса минстройлöн да Сыктывкарса администрациялöн сайтъясысь.
А кутшöм стрöйба позьö лэптыны да «амнистия» серти гижöдны участокад?
Му вылын, кодöс сетлісны ас керка стрöитöм да ас овмöс лöсьöдöм могысь, оз позь кыпöдны, шуам, гостиница либö лавка. Тайö лоас аснаукалöм, сы вöсна мый некутшöм документ наöн вöдитчöм могысь оз сетны, а стрöйбасö ковмас разьны.
Участок вылын стрöитчигöн быть колö кутны тöд вылын, мый кыпöдны позьö сöмын куим судтаа, кызь метр джуджда керка, кöні мöдас овны öти семья. Стрöйбасö оз позь юклыны некымын торъя патера вылö. И, дерт, керкасö оз позь кыпöдны мукöд олан стрöйбакöд орччöн.
Стрöитчигöн вермасны ковмыны содтöд сёрнитчöмъяс да документъяс, керкасö кö кыпöданныд ва, би проводъяс, биару трубаяс, ю-ты дорын.
Россияын медунаöн «дачнöй амнистия» сертиыс гижöдöмаöсь эмбурсö 2009, 2010 да 2018 воясын, кор повзьылöмаöсь, мый водзö татшöм кокньыда тайöс оз вермыны вöчны. Медводз асэмбуравлöмаöсь му, бöръя кадö тшöкыдджыка гижöдöны керкаяс.
Мыйла колö гижöдны ас вылад мусö да стрöйбаяссö?
Уна во чöжöн йöзыс, кыдз найö лыддьöны, асланыс мутор вылын кыпöдлісны олан да мукöд стрöйба, но некутшöм документ та йылысь налöн эз вöв. А татöг ньöбны-вузавны, козьнавны, вежны, банкысь сьöм босьтігöн сетны закладö, а сідзжö завещание серти кодлыкö кольны татшöм эмбурсö оз позь. Татшöм му да стрöйба кузя он вермы шыöдчыны нотариус, страхöвöй агент да коммунальнöй овмöсын зільысьяс дінö.
Бöръявыв Людмила Коновалова юöртіс, кутшöм норасьöмъясöн йöзыс шыöдчылöны прокуратураö. Сідз, му участокъяссö кодсюрö босьтöмаöсь тöвнас, а лым сылöм бöрын весьöпöрöмаöсь — олан керкасö сэні лэптыны оз позь, зэв васöд да. Норасьöны и кадастр вöчысь инженеръяс вылö. Сідз шусяна межевание нуöдігöн пö мусö этшаджык арталöны. Унаöн оз лöсявны суседъясыскöд. Став татшöм зык-венсö видлалöны меставывса власьт тэчасын. А прокуратура нин видзöдö, кутшöм ногöн чинаяс корсисны петан туй.
Но унатор абу карса администрация сайын. Сідз, дачаын во гöгöр олысьяс тшöкыда норасьöны весавтöм туй вылö. Та вöсна пö оз нуны шыблас, оз вермыны локны тэрыб отсöг сетан да кусöдчан машинаяс. Татшöмъясыслы гöгöрвоöдам, мый та вöсна колö тöждысьны аслыныс олысьясыслы.
Людмила Александровна нöшта казьтыштіс, мый локтан вося мартыд абу нин сэтшöм ылын, он и тöдлы помасяс «дачнöй амнистияыд». Та вöсна нюжмасьны оз ков. Эм кö тіян документтöм му да стрöйба, колö удитны став колана кабаласö дасьтыны-лöсьöдны. Гашкö, и збыльысь тайö «амнистиясö» бöръяысь нюжöдісны.
Николай Размыслов.