Апрель 2 лунö Коми Республикаса юралысь Сергей Гапликов дугöдчис аслас уджмогъясысь. Тайö жö лунö Россияса президент индіс Комиын юралысьлысь удж вöчысьöн Владимир Викторович Уйбаöс, коді таöдз вöлі Россияса йöзлысь дзоньвидзалун видзöм кузя министрöс вежысьöн. Специальносьт сертиыс — врач-гигиенист, эпидемиолог.
Апрель 3 лунö Россияса президентöс Рытыв-Войвыв федеральнöй кытшын петкöдлысь Александр Гуцан видеоконференцсвязь пыр официальнöя тöдмöдіс Владимир Уйбакöд.
«Ми кутам лача тіян веськöдлан да олан сям, тöдöмлун да кывкутöм вылö. Но республикаын коронавирус висьöм паськалöмкöд йитöдын медводз ковмасны тіян удж сикасын тöдöмлунъясыд, — шуис Александр Гуцан Владимир Уйба дорö шыöдчигöн. — Веськöдлан тэчаслöн öні медшöр могыс — водзсасьны коронавирус паськалöмлы паныд».
Уджö босьтчигас нин Комиын Владимир Викторович кöсйысис веськыда висьтавны республикаса олысьяслы, мый вöчсьö коронавируслы паныд водзсасьöм могысь.
Апрель 5 лунö сійö видео пыр шыöдчис регионса войтыр дорö: «Öні миян медшöр мог — паськыдджыка туясьны тестъясöн, медым кыдз позьö öдйöджык эрдöдны дзоньвидза войтыр пöвстысь висьысьясöс. Колö сідзжö дасьтыны бурдöдчанінъясын содтöд койкаяс, ньöбны лолавны отсалан аппаратъяс. Кута лача, апрель помöдз став урчитöмторсö лоö збыльмöдöма».
Коми Республикаса юралысьлысь удж вöчысьлысь видеошыöдчöмъяссö позьö ви-дзöдны-кывзыны сылöн пресс-службалöн «ВКонтактеын» лист бокын да ютуб-каналын.
Стопкоронавирус.рф сайтын юöр серти, апрель 8 лун кежлö лабораторияын туясьöмöн Комиын эрдöдöма COVID-19 инфекцияöн 119 нёрпалысьöс. Ставныс бöрся видзöдöны бурдöдысьяс.
Россия пасьталаын пасйöма 8.762 татшöм висьысьöс. 580 морт бурдöма нин, на пöвстысь миян регионын — 1. Кувсьысьыс 63, на пöвстысь 3 Комиын.