Тӧрыт, апрель 5 лунӧ, Владимир Уйба медводдзаысь шыӧдчис республикаса олысьяс дорӧ. Видеоын юралысьлысь удж вӧчысь висьталіс, кутшӧм удж нуӧдсьӧ коронавируслы паныд водзсасьӧм могысь.
«Ӧні миян медшӧр мог – паськыдджыка нуӧдны туялан удж – тестирование, тайӧ отсалас корсьны дзоньвидза войтыр пӧвстысь висьысьясӧс. А специалистъяслы лоӧ гӧгӧрвоана, мый колӧ вӧчны, медым вирусыс эз паськав водзӧ, – висьталіс Владимир Уйба. – Уджыс мунӧ, ме ас пайысь вӧча ставсӧ, медым колана эмбур воис республикаӧ кыдз позьӧ ӧдйӧджык. Аски виччысям медводдза тестъяс. Чайта, вежон шӧрас нин лоасны тӧдчана вежсьӧмъяс. И найӧ, кодъяс пырӧны сідз шусяна риск группаӧ, тайӧ тестъяссӧ вӧчасны».
Владимир Уйбалӧн тшӧктӧм серти сідзжӧ вежасны уджалан нырвизьсӧ и мукӧд бурдӧдчанінын, на подулын кутасны бурдӧдны коронавирусӧн висьысьясӧс.
«Татшӧм учреждениеяссӧ индӧма нин, сэні мунӧ дасьтысяна удж. Ковмас кӧ, талун кежлӧ миян эм позянлун вичмӧдны нӧшта 300 койка. Гӧгӧрвоана, мый колӧ и бурдӧдчан эмбур – ИВЛ аппаратъяс да кислород. И найӧс корсьны – нӧшта ӧти ыджыд мог. Миянлы колӧ лолавны отсалан 144 аппарат. Талун унаӧн татшӧм аппаратсӧ кӧсйӧны ньӧбны, ӧд весиг медся водзмӧстчысь канмуясын найӧ оз тырмыны. Ми тайӧс бура гӧгӧрвоам, эскӧдам, мый апрель помӧдз мытшӧдсӧ венам», – содтіс юралысьлысь удж вӧчысь.
Владимир Уйба сиис Комиын олысьяслы лоны дзоньвидзаӧн да корис кывкутны ас да матысса вӧсна – овны гортын. Ас кежысь олан режим Комиын лоӧ апрель 30 лунӧдз на.
«Быд висьӧм позьӧ венны. Медшӧрыс – гӧгӧрвоны, мый могысь ми тайӧс вӧчам. Эскӧда тіянӧс, мый ме да менам уджъёртъяс тайӧс гӧгӧрвоам. Аски ме бара пета эфирӧ. Аддзысьлытӧдз!», – кывкӧрталіс юралысьлысь удж вӧчысь Владимир Уйба.
Видзӧдны тайӧ шыӧдчӧмсӧ позьӧ юралысьлӧн пресс-службалӧн «Вконтактеын» лист бокын да ютуб-каналын.
«Ӧні миян медшӧр мог – паськыдджыка нуӧдны туялан удж…»
rkomi.ru лист бокысь