Школаын армия кежлӧ зонпосниӧс дасьтігӧн унджык нокыс ӧшйывлӧ военруклӧн, ӧнія ногӧн кӧ – ОБЖ да физкультура велӧдысьлӧн пельпом вылӧ.
Ичӧт классъяссянь нин челядь велӧдчӧны мичаа ветлыны стройӧн, колана ног командуйтны, гӧлӧс пуктӧмӧн мытшъявтӧг рапортуйтны, неминуча дырйи мыччыны ёртыслы отсӧга ки, дорйыны пӧгибысь асьсӧ, сюся уджавны компасӧн, вошласьтӧг гежмавны пармаяг, кад воштытӧг дасьтыны бипур да кужӧмӧн косьтыны сы дорын кӧтасьӧм кӧлуй.
Гырысьджык классъясын томулов тӧдмасьӧны уставӧн, велӧдчӧны ӧдйӧ разьны-чукӧртны автомат, стӧча лыйсьыны пасӧ, дзебсясигмоз кыскасьны ӧружиеӧн, шыблавны граната, сюся пасьтавны противогаз да защитнӧй костюм, тӧдны ӧружиелысь сикассӧ да кужны видзчысьны сыысь.
Водзынджык кӧ тайӧ предмет сертиыс ёнджыкасӧ песісны зонъясӧс, то бӧръя кадас уна ныв мунӧ водзӧ босьтны тӧдӧмлун военнӧй дисциплинаысь, и велӧдан корӧмъясыс лоины зонъяскӧд ӧткодьӧсь. Сідзкӧ, тайӧ урокъясыс быдмысь войтырлы дзик нин быть коланаӧсь. Сӧмын тай бӧръя кызь вонас школаясын материально-техническӧй подулыс дзикӧдз рушмис, он нин нинӧмӧн лышкыдась урок дасьтігад да сетігад Сӧвет кадад моз – кольӧмасӧ дӧмлан-утъялан.
Кулӧмдін районын меддыр уджалӧны, тайӧ дисциплинасьыс тӧдӧмлун сетӧны Немдінысь Владимир Георгиевич Шешуков (15 во), Зимстанысь Евгений Андреевич Кочанов (24 во), Керчомъяысь Валерий Александрович Попов (41 во) да Пожӧгысь Владимир Игоревич Шомысов (45 во). Кыдз шуласны, пӧрысь понйыд ройӧ оз увт. Ставныслӧн опыт-сямыс чӧжсьӧма солькъясьмӧн. Со и быдтасъясныс ӧтторъя петӧны вермысьясӧн районса да республикаса «Орлёнок», «Зарница» вермасьӧмъясын, призывӧдз томуловлӧн спартакиадаын, бур тӧдӧмлун петкӧдлӧны олимпиадаясын. Кӧнсюрӧ восьталісны кадет классъяс.
Ёна ошкӧны тайӧ сикт-посёлокысь петӧм, вылыс тшупӧда тӧдӧмлун босьтысь челядьӧс Санкт-Петербургын, Москваын, Перымын, Архангельскын. Вузын велӧдысь офицеръяс да армияса часьтъясысь командиръяс тшӧкыда пӧ юавлӧны миян курсант-салдатъяслысь, кутшӧм военнӧй училищеын пӧ дасьтісны тіянӧс да кытысь татшӧм пыді тӧдӧмлуныс?
Снимок вылын шуйгавывсянь:
Е.А.Кочанов, В.И.Шомысов, В.Г.Шешуков 2019 во помын Санкт-Петербургын содтӧд тӧдӧмлун босьтігӧн.